Завхан аймгийн Нэгдсэн эмнэлэг нь жилд дунджаар 100-120 баллон хүчилтөрөгчийг Улаанбаатар хотоос өндөр өртөгтэйгээр худалдан авч ажилладаг байна. Тэгвэл Завхан аймгийг хөгжүүлэх 2021 оны төлөвлөгөөнд тусгасны дагуу улсын төсвийн 270 сая төгрөгийн хөрөнгө оруулалттайгаар тус аймгийн Нэгдсэн эмнэлгийг түшиглэн Хүчилтөрөгчийн бэсрэг үйлдвэр байгуулжээ.

Завхан аймаг бэсрэг үйлдвэртэй болсноор цаг хугацаа, зардал хэмнэхээс гадна Нэгдсэн эмнэлэг, Төрөх эмнэлгийн бүх тасгийг 24 цагийн турш хүчилтөрөгчөөр хангах боломж бүрдэж, яаралтай тусламж хүргэх, хүний амь нас аврах, ковидын халдвараар өвчилсөн иргэдийн эмчилгээнд чухал хэрэгцээтэй зэрэг олон давуу тал бүрдэж байна.

Тус үйлдвэр нь аймгийн Нэгдсэн эмнэлгийн бүх тасгуудад хүчилтөрөгчийг түгээхийн зэрэгцээ хоногт 30-40 ширхэг хүчилтөрөгчийн баллон цэнэглэх хүчин чадалтай тул 23 сумын Эрүүл мэндийн төвийг хүчилтөрөгчөөр бүрэн хангах боломжтой.