Орхон аймаг энэ жилийн баяр наадам зохион байгуулахад 300 сая төгрөг төсөвлөсөн байжээ. Харин тус аймгийн Засаг дарга энэ жил наадам зохион байгуулахгүй байх шийдвэр гаргажээ. Мөн наадам зохион байгуулах байсан 300 сая төгрөгийн 200 саяыг нь цар тахалтай тэмцэх үйл ажиллагаанд зарцуулж, аймгийн Нэгдсэн эмнэлэгтээ шаардлагатай тоног төхөөрөмж болон эмчилгээний зардалд зарцуулахаар болсон байна. Энэ талаар тус аймгийн Засаг дарга С.Батжаргал “ИТХ-ын ээлжит хуралдаанаар үлдэгдэл 100 сая төгрөгийг хэрхэн зарцуулах талаар төсвийн тодотгол хийнэ. Миний зүгээс цаг үе хэцүү байгаа энэ үед шаардлагатай хөрөнгийг шуурхай шийдвэрлэн ажиллаж байна. Мөн коронавирусийн халдвар өдөр ирэх тусам нэмэгдэж, цар тахал гамшгийн хэмжээнд хүрсэн энэ цаг үед баяр наадмыг тэмдэглэхгүй байх нь зөв гэж үзэж байна” гэлээ.