Нийслэлийн Засаг дарга бөгөөд Улаанбаатар хотын захирагч Х.Нямбаатар Сүхбаатар дүүргийн XI хороо, Баянбүрдийн тойргоос 32-ийн тойрог явах замын нөхцөл байдалтай танилцаж, мэдээлэл өглөө.

  Тэрбээр "Сүхбаатар, Чингэлтэй дүүргийн нутаг дэвсгэрийн дунд буюу Баянбүрдийн тойрог орчимд явагдаж буй 1008 айлын орон сууц болон барилга угсралтын ажил ирэх зургадугаар сард Улсын комиссын ажлаар байгаа. Мөн Төрийн албан хаагчийн орон сууцны бүтээн байгуулалтын ажил дуусах дөхөж байна. Улаанбаатар хотын төв талбайгаас километр гаруй зайд хоёрдогч түүхий эд авдаг, тос тосолгоо, дугуй засвар хийдэг байршлууд нэгдүгээр эгнээнд үргэлжилж байна. Нийтийн эзэмшлийн зам талбай дээр хог хаягдал, түүхий эд аваад, тос асгаад байдаг энэ зүйл бол хотын төлөвлөлт биш юм. Улаанбаатар хотыг 2040 он хүртэл хөгжүүлэх ерөнхий төлөвлөгөөний дагуу тухайн хороолол, нэгж талбайг хэсэгчилсэн байдлаар хөгжүүлэх төлөвлөлтийн дагуу явагдах ёстой. Энэ хүрээнд энэ жил нийслэлийн 40 гаруй байршилд газар чөлөөлөхөөр, эхнээсээ ажил өрнөөд эхэлсэн. Тэгэхээр иргэд болон аж ахуй нэгжүүд нийслэлийн ажлыг хүндлээд зам, гүүр барих, инженерийн шугам сүлжээгээ татах, цаашлаад сургууль, цэцэрлэг, орон сууцны хороолол барьж байгуулахад зайлшгүй төлөвлөгдсөн газруудыг чөлөөлөхөд илүү хурдан ойлголцолд хүрэхийг уриалж байна" гэв.