Улаанбаатар хотоос Орхон аймгийн чиглэлд шатахуун тээвэрлэж явсан ачааны галт тэрэг Сэлэнгэ аймгийн Орхонтуул сумын Шар-Ус багийн Цагаан тохой хэмээн газар замын хажуу руу унасан осол гарсан. Борооны улмаас төмөр замын ул шороо угаагдаж төмөр замд эвдрэл үүсэж Салхит өртөөнөөс Эрдэнэт өртөөний чиглэлд 78 дугаар км-т ачааны галт тэрэгний есөн вагон /долоон вагон дизель түлш, нэг вагон элс, нэг вагон масло/ унаснаас асгарсан түлшний хэмжээ ойролцоогоор 80-100 тонн гэж тогтоогоод байна.  Түлш асгарсан талбай гурван га хамарчээ.

Ослын газарт Байгаль орчинд үүсэх хохирлын хэмжээг бууруулахаар 35-40 см гүнтэй хөрс хуулалт хийж,  цуваанд ачиж явсан элс хайргыг ашиглан асгарсан түлшийг шингээж авах арга хэмжээ авсан байна. Хөрс болон уснаас гурван байрлалаас дээж авч шинжилгээ хийн байгаль орчинд нөлөөлөх хохирлын үнэлгээг тогтоохоор ажиллаж байна. Ургамлын төрөл зүйлийг тогтоож, хорт бодисыг саармагжуулах, хөрс, усыг хамгаалах, нөхөн сэргээх арга хэмжээг шинжилгээнд үндэслэн шат дараатай авах юм. Одоогоор хуулсан эрүүл хөрсийг буцааж дэвссэн аж.

Түлш асгарсан газар нь Орхон голоос 5-6 км зайтай бөгөөд  голд түлш хүрээгүй. Осол болсон газраас 500 метр гаруй зайтай борооны улмаас тогтоол ус үүссэн байсан. Тогтоол ус руу түлш орсон учир уснаас дээж авч эрсдэлийг үнэлэх ажлыг шуурхай зохион байгуулж байгаа мэдээллийг Сэлэнгэ аймгийн байгаль орчин, аялал жуулчлалын газрын дарга З.Түвшинтөгс өглөө.