Менингоккокт халдварын нэг тохиолдол бүртгэгдсэнтэй холбогдуулан Налайх дүүргийн Эрүүл мэндийн төвөөс мэдээлэл өглөө.

     Мэдээлэлд "Өчигдөр буюу 2025 оны нэгдүгээр сарын 29-ны 08:30 цагт гурван нас, долоон сартай эрэгтэй хүүхэд Налайх дүүргийн өрхийн эрүүл мэндийн төвд өндөр халууралттай ирж үзүүлсэн. Өрхийн эмч анхан шатны үзлэгээр менингоккоктын сэжиг илэрсэн гэж үзэж, Дүүргийн халдвартын тасагт хүргэсэн. ХӨСҮТ-ийн Тандалтын албанд тухайн өдрийн 10:20 цагт мэдээлж, лабораторт шинжилгээ өгсөн. Ингээд оройны 17:57 минутад шинжилгээний хариу эерэг гарч, менингоккокт халддвар болох нь тогтоогдсон. Одоогоор бид Налайх дүүрэг Онцгой байдлын комисс болон Шуурхай штабыг яаралтай хуралдуулж, хариу арга хэмжээг авч ажиллаж байна" гэв.

           Үргэлжлүүлэн Налайх дүүргийн Эрүүл мэндийн төвийн дарга Л.Байгаль "Бид тандалтын баг гаргаж, ойрын болон холын хавьтлуудыг судлах үйл ажиллагаа явуулж байна. Халдвар илэрсэн хүүхдийн цэцэрлэгийн ангийнхны эцэг, эхчүүдийг цуглуулж, хүүхдүүдээс шинжилгээ авч, үзлэг хийсэн. Үүнээс эмнэл зүйн үзлэгээр хоёр сэжигтэй тохиолдлыг тодорхойлсон. Мөн гэр бүлийнх нь гишүүдээс шинжилгээ авч, ХӨСҮТ-рүү зургаан шинжилгээ явуулсан. Өнөө өглөөний байдлаар шинжилгээний хариу бүгд сөрөг гарсан учир тусгаарлалтад байгаа зургаан хүнийг гаргахаар шийдээд, зөвлөгөө өгч байна. Халдвар илэрсэн хүүхдийн биеийн байдал хүнд байгаа. Анх ирэхдээ 4-5 см хэмжээний огцом толботой тууралттай, өндөр халуунтай, хордлого ихтэй хүүхэд ирсэн. Эмчилгээ үргэлжилж байна" гэлээ.