ХӨСҮТ-ийн Статистикийн их эмч О.Мандалаас энэ онд бүртгэгдсэн бэлгийн замын халдварт өвчлөлийн талаар тодрууллаа.

       О.Мандал “Энэ оны нэгдүгээр сарын байдлаар улсын хэмжээнд бэлгийн замын халдварт өвчний 890 тохиолдол бүртгэгдсэн. Энэ нь нийт халдварт өвчний 29.3 хувийг эзэлж байна. Энэ онд бүртгэгдсэн халдварт өвчний 890 тохиолдлоос 43.1 хувийг нь тэмбүү, 36.2 хувийг нь заг хүйтэн, 20.7 хувийг нь трихомониаз өвчин эзэлж байгаа юм. Өмнөх оны мөн үетэй харьцуулахад  энэ нь 186 тохиолдлоор буурсан үзүүлэлт байна. Гэсэн хэдий ч халдварт өвчний өвчлөл өндөр байна. Улсын дундаж үзүүлэлтээс харахад тэмбүүгийн халдвар нь Төв, Завхан, Хөвсгөл, Баянхонгор, Өмнөговь аймагт болон Улаанбаатар хотод голчлон бүртгэгдэж байна. Харин БЗДХ-аар 20-29 насныхан түлхүү өвчиж байгаа бол эрэгтэй хүн илүү өртөж байна. 2023 онд улсын хэмжээнд төрөлхийн тэмбүүгийн 31 тохиолдол бүртгэгдсэн.

Монгол Улсад 1992-2023 оны хугацаанд ХДХВ/ДОХ-ын тохиолдол 369 хүн өвчилж, үүнээс харамсалтай тохиолдлоор 63 хүн нас барсан.

Ташрамд сонирхуулахад, ХӨСҮТ-ийн ДОХ/БЗДХ-ын тандалт судалгааны албанаас “Улаан тууз” нэртэй  албан ёсны цахим хуудас ажиллуулдаг. Энэ хаягт бэлгийн замын халдварт өвчнөөс урьдчилан сэргийлэх зөвлөмж зөвлөгөөг тогтмол байршуулдаг. Мөн зөвлөгөө авах утас байршиж тогтмолжсоноор шаардлагатай хүмүүст өвчний талаар хүргэх, хаяг байршил, цагийн хуваарь гэх мэт асуултад хариулдаг. Зөвлөгөө авах утас руу бэлгийн замын халдварт өвчин дундаас хамгийн их асуугдсан нь тэмбүүгийн өвчлөл байна” гэсэн юм.

Иймд иргэд та бүхнийг халдварт өвчнөөс урьдчилан сэргийлэн, халдварын шинж тэмдэг илэрсэн тохиолдолд яаралтай эмнэлгийн байгууллагад хандахыг зөвлөж байна.

Б.Хонгорзул