Ямар ч бүдэг гэрэл насанд хүрсэн хүний нойрсолтыг муутгаж, эрүүл мэндийн олон асуудал үүсгэдгийг  судлаачид тогтоожээ. Тодруулбал, “Гэрэлтэй орчинд унтахад таргалалт, чихрийн шижин, цусны өндөр даралт зэрэг эрүүл мэндийн асуудлууд хүмүүст үүсдэгийг баталлаа” гэж АНУ-ын Чикаго хотын Фейнбэргийн Эрүүл Мэндийн Их сургуулийн эрдэмтэн Филлис Зи мэдээллээ. Ингэхдээ  “Хүмүүс гэрэлгүй, харанхуй орчинд унтаж заншвал сайн” гэв.

    Тухайлбал зурагтын дууг хаагаад асаалттай унтахад 20 орчим насны залуусын хувьд хүртэл цусан дахь саахрын хэмжээ, зүрхний цохилтын хурд нэмэгддэгийг түүний ахалсан баг судалж тогтоосон байна. Нүдээ бүрэн аниад унтсан ч бүдэгхэн гэрэл хүртэл нойрсолтын чанарыг муутгадаг гэнэ. Филлис Зигийн баг ихэнх судалгаагаа эрүүл мэндийн хувьд илүү эрсдэлтэй ахмад насны хүмүүст төвлөрүүлжээ. Тэд 63-84 насны 552 эрэгтэй, эмэгтэй хүнд тусгай төхөөрөмж зүүлгээд нойрсолтын чанар, гэрэлийн хэмжээ хоёрын харилцан холбоог тодорхойлох туршилт явуулсан юм байна. Ингэхэд ахмад настнуудын хувьд эрсдэл бүр илүү өндөр байгааг тогтоожээ.

   Тиймээс шөнө унтахдаа ороо цонхноос хол байрлуулах, эсвэл цонхны гэрлийг хөшгөөр бүрэн хаах, гар утас, зөөврийн компьютерыг унтлагын өрөөндөө цэнэглэхгүй байх, нүдэндээ хаалт зүүж унтах зэрэг аргуудыг зөвлөсөн байна. Ахмад настнуудын хувьд эрүүл мэндийн шалтгаанаар шөнө сэрээд жорлон явах шаардлага гардаг. Энэ тохиолдолд хүртэл болж өгвөл гэрэл асаахгүй байхыг зөвлөлөө.

Эх сурвалж: CNN