БШУ-ны сайд Л.Энх-Амгалан "Хувьсах зардал ба сургалтын төлбөр" сэдэвт хэвлэлийн хурал хийлээ.  Тэрбээр "Цар тахлын хуулийн хэрэгжилттэй холбоотой гурван хуулийн заалт байна. Нэгдүгээрт, өмчийн хэлбэр харгалзахгүй бүх шатны боловсролын байгууллагын хичээл сургалтын үйл ажиллагааг тодорхой хугацаагаар теле, цахим хэлбэрт шилжүүлэх, сургалтын болон дотуур байрны төлбөрийг хөнгөлөх, дараагийн төлбөрт шилжүүлэх  журам баталсан. Хоёрдугаарт, сургалтын чанар хүртээмж буюу хичээлийн хоцрогдлын асуудлаар Засгийн газар хяналт тавьж ажиллахыг үүрэг болгосон. Гуравдугаарт, хичээлийг танхимаар бус цахимаар зохион байгуулсан бол сургалтын чанарыг алдагдуулах байх чиглэл өгсөн.

Журмын дагуу хоёр ажлын хэсэг гарсан. Нэг ажлын хэсэг нь Их дээд сургуулийн сургалтын төлбөрийн асуудлыг хариуцсан бол нөгөө нь  хувийн өмчийн ерөнхий боловсролын сургуулийн асуудлыг хариуцсан. Их дээд сургууль дээр төлбөрийн уян хатан нөхцөлөөр төлбөрөө авах, хичээл сонгоход урьдчилсан төлбөр нэхэхгүй цуцлахгүй  байх, анги дэвших болон төгсөлтийн шалгалтыг хамгаалалтад аруулах, дадлага хийлгэх боломжоор хангах, дотуур байрны төлбөрийн буцах чиглэлээр ажиллаа.

Монгол Улсад 88 их, дээд сургууль, 147 мянга гаруй оюутан байна. Үүнээс 20860 суралцагч сургалтытөлбөрийн хөнгөлөлт, тэтгэлэг зээлд хамрагдсан байна. 11 мянган оюутан Засгийн газрын болон Боловсролын зээлийн сангийн тэтгэлэг авчээ. хувийн сургуулиас 9700 оюутан 50-100 хувийн хөнгөлөлт эдэлж байна. Ерөнхий боловсролын сургуулиудад хувьсах зардал өгөхгүй гэсэн. Энэ нь ажил хэрэг боллоо. Монгол Улсад нийт 167 хувийн хэвшлийн дунд сургууль байна. Нийт 48300 суралцагч байгаа юм. Сургалтын төлбөр өндөртэй буюу 5-10 сая төгрөгийн төлбөртэй 24 сургууль байгаа юм байна. Энэ сургуульд хувьсах зардал өгөөгүй. Таваас доош төлбөртэй сургууль гурван нөхцөлөөр хувьсах зардал олгосон. Нэгдүгээрт төсвийн гүйцэтгэлийг нь хянана. Хоёрдугаарт, сургалтын үйл ажиллагааг тасралтгүй явуулсан тайлан авна. гуравдугаарт, сургалтын төлбөрт хөнгөлөлт үзүүлсэн байдлыг үндэслэж, хувьсах зардал олгосон байгаа юм" гэлээ.