“Хүчит шонхор” захаас махны үнэ ханш сурвалжиллаа.

Жижиглэнгийн махны лангуунууд махгүй шахуу харагдана. Худалдаачид ч  “Хонины цул мах байна шүү, хямдруулаад өгнө” хэмээн уриалгахан дуугарцгаах аж Эл захад хонины цул мах нэг килограмм нь 11500 төгрөг, ястай нь  9500 төгрөгөөр худалдаж байв. Харин үхрийн цул мах 14 мянга, ястай нь 13.5 мянган төгрөг байгаа бол ямааны мах килограмм нь 10500 төгрөгөөр худалдаж байсан юм. Түүнчлэн адууны мах килограмм нь 12 мянга байгаа бол тэмээний мах 8500 төгрөг гэж байлаа.

Цар тахлын нөхцөл байдал хүндэрч,  хөл хорио чангарснаар махны нийлүүлэлт багассан талаар махны худалдаа эрхлэгчид учирлана. Энэ талаар жижиглэнгийн лангууны хамгийн эхний худалдагч Н.Мангалжав “Хөл хорио тогтоож, зам хааснаас болж  малчдаас мал ирэхгүй байгаа. Ченж нар махгүй болсон учраас худалдан авагчид ч ирэхгүй байна шүү дээ. Энэ жил шиг ийм мах ховор жил үзсэнгүй. Одоо үлдсэн жаахан махаа зарах гэтэл хаягдал их гараад зарах юм гарахгүй л байна. Ченж нар махаа хятад руу гаргаж байгаа байх. Махны үнэ өмнөх сарынхаас 1500-2000 төгрөгөөр өссөн. Нөөцийн мах ирэхгүй байгаа учир махны хомстол үүсэж, үнэ өссөн” гэв.

“Цаашид нөөцийн мах ирэхгүй бол “Хүчит шонхор” зах махгүй болоход ойрхон байна”

“Хүчит шонхор” захад хүн зоны хөдөлгөөн байв. Энд, тэнд л ганц, хоёр хүн мах авч байсан юм. Жижиглэнгийн махны худалдагчаас махны нийлүүлэлт болон борлуулалтын талаар асуухад “Иргэд хөл хорионы улмаас санхүүгийн чадваргүй болсон. Худалдан авах чадвар муу байна. Иргэд өмнө нь 10 кг мах авдаг байсан бол одоо 1-2 килограммыг жижиглэж авдаг болсон. Цаашдаа нөөцийн мах ирэхгүй бол манай зах махгүй болоход ойрхон байна”  гэлээ.

Д.ЦЭДЭВСҮРЭН