Нийслэлд авто замын эвдрэл, гэмтэл жил ирэх тусам нэмэгдэж, иргэдийн бухимдлыг түрүүлсээр байна. Жил бүр автозамын бүтээн байгуулалтад тодорхой хэмжээний хөрөнгө төсөвлөж, завсар хийдэг ч энэ нь нэг удаагийн үерийн усанд урсчихсан тохиолдол өнгөрсөн жилүүдэд цөөнгүй гарч байлаа. Энэ жил ч мөн үерт эвдэрсэн замууд урсахгүй гэх баталгаа алга. Энэ талаар бид дараах сурвалжилгыг бэлтгэлээ.

          Чингэлтэй дүүргийн “Хүчит Шонхор” зах орчим түм түжгэнэж бум бужигнасан хөл хөдөлгөөн ихтэй байлаа. Нийслэлийн хүн амын хүнс, махны хэрэгцээг хангадаг энэ захад өвөл, зунгүй хүн машин хөлхөлддөг. Иймдээ ч энэ хэсгийн авто замд эвдрэл гэмтэл нэлээд бий. Хүчит шонхор захын урд уулзвраас Баянхошуу руу өгсөх замаар автомашин явахад бэрх болжээ. Нэг урсгалтай замын голд том хэмжээний нүх үүсэж, тойрч гарахын  тулд зам дээр ачаалал үүсэж байгаа харагдана. Мөн энэ зам зах хэсгээрээ ч ялгаагүй эвдрэлтэй,  өгсүүр учраас өвлийн хүйтэнд халтиргаа, гулгаа ихтэй гэдгийг жолооч нар хэлж байлаа.

-Хагарсан зам бөглөсөн дээгүүр гарахаар дугуй хий эргэж, газар малтаад хойд талын машины цонхыг замын нүх бөглөсөн хайргаар хагалчих гээд байдаг-

Бид эндээс хөдөлж Сүхбаатар дүүргийн VI хороонд хүрэв. Хотын төв цэг гэгдэх энэ хэсэгт гэхэд л эвдрэлтэй зам хаа сайгүй таарна. Тухайлбал, “Жонон мал эмнэлэг” болон “Орон сууц нийтийн аж ахуйн удирдах газар”-ын дунд замд траншейны нүх байх ба нүхийг тойроод зам нь цөмөрч оржээ. Цөмөрсөн нүхний дээд хэсэгт хайрга, шороо асгаж битүүлсэн харагдана.  Автомашин гэлтгүй явган хүн ч анзааралгүй унаж, бэртэх аюултай юм. Энэ талаар тус газраар зорчиж байсан иргэдээс тодруулахад “Энэ замаар явахад их хүндрэлтэй. Нэг урсгалтай замын нэг талд нь маш том онгорхой үүссэн болохоор урсгал сөрж, нүхийг нь тойрч гарахгүй л бол шууд явахад хайрга нь хонхойж, зарим хэсгээрээ цөмөрсөн учир дээгүүр нь явахад хэцүү байдаг. Уг нь траншейны нүхний таглаа байсан юм. Хөдөлгөөний улмаас цөмрөөд нүхийг нь битүүлэх гээд хайрга асгасан юм билээ. Дээгүүр нь гарахаар хойд талын машин руугаа сул хайрга нь дугуйны эргэлтээр цацагдаж, цонх шилийг нь хагалчих гээд байдаг” хэмээсэн юм.

32 гудамж, автозамд 30 мянга орчим метр квадрат засварын ажил хийх захирамж гарсан

Энэ мэтчилэн Улаанбаатар хотод эвдрэлгүй зам тун ховор. Бид нийслэлийн эвдрэлтэй замыг хэрхэх талаар Улаанбаатар хотын замын завсрын асуудлаар холбогдох  Нийслэлийн зам тээврийн хөгжлийн хэлтсийн  дарга Д.Ганбатаас тодрууллаа.

 Тэрбээр “Улаанбаатар хотын зургаан дүүрэг, алслагдсан гурван дүүрэгт урсгал засварын захирамж ажлуудын үйл ажиллагаагаа эхэлж байна. Улаанбаатар хотод нийт 170 нэршил бүхий замуудад нийт урсгал засварын ажилд нөхөлт засварын ажил хийнэ. Мөн Улаанбаатар хот болон туслах гудамж замуудад нийт 60 мянган ам метр газарт урсгал засвар нөхөөсний ажил хийхээр төлөвлөсөн. 32 гудамж замуудад 30 мянга орчим метр квадрат засварын ажил хийх төлөвлөгөө гаргаад байна. Мөн тэмдэг тэмдэглэгээний ажлууд захирамжаараа батлагдаад явж байгаа. Алслагдсан гурван дүүргийн хувьд тоо хэмжээ тодорхой гараад явж л байна. Нэмж хэлэхэд өвөлжилтийн бэлтгэл ажил өнгөрсөн намраас тусдаа захирамж аваад шийдэгдээд явах юм. Гэхдээ өвөлжилтийн ажлын тухай тодорхой тоо баримт гараагүй байгаа” хэмээсэн юм.

-Баянзүрх дүүргийн хоёрдугаар хороо Сансрын шатахуун түгээх станц 59 дүгээр байр орчмын зам

-Баянзүрх дүүргийн 16 дугаар хороо нийслэлийн ерөнхий боловсролын 53 дугаар сургуулийн урд талд

-Баянзүрх дүүрэг хоёрдугаар хороо Их тойруу Жавхлант төвийн урд зам

-Сонгинохайрхан дүүргийн 18 дугаар хороо Таван шар "Сод монгол" шатахуун түгээх станцын урд хэсэг

-Баянгол дүүргийн наймдугаар хороо Модны-2 голын зам ГССҮТ-ийн зүүн урд талд

-Сонгинохайрхан дүүргийн 30 дугаар хороо Нэгдүгээр хорооллын арын зам

-Баянгол дүүргийн долдугаар хороо Модны-2 голын зам