Дэлгэр зуны наадмын өдрүүд улам ойртож, иргэд үндэсний хувцсаараа гоёх бэлтгэлдээ оржээ. Сүүлийн жилүүдэд дээл улам шинэчлэгдэж, өнгө загвар, эсгүүрийн хувьд илүү төрөлжсөн нь залуу үеийн сонирхлыг ихэд татах болсон. Наадмын өмнөхөн нийслэлийн худалдааны төвүүд, оёдлын газруудад дээл авах, захиалгаар оёулах хүмүүсийн хөл хөдөлгөөн эрс нэмэгджээ. Мөн олон хүн онлайнаар захиалга өгч, загвараа сонгон бэлдэх болжээ. Бид дээлний үнэ ханшийг тодрууллаа.

Дээлний онцлог, хийцийн ялгаа

Өнөөгийн үндэсний дээл уламжлалт дээлийн хэлбэрийг хадгалж, загвар, материал, чимэглэл нь онцлог. Өдөр тутмын хэрэглээнд зориулсан загварууд хөнгөн даавуу, торгон материал, сэрүүн уналттай эсгүүрээр хийгддэг бол хүндэтгэлийн дээлд илүү тод өнгө, хээ угалз, алтлаг, мөнгөлөг чимэглэлтэй торго, атлас зэрэг материал зонхилдог байна.

“Түмэн торго”

Хамгийн өргөн сонголт санал болгодог “Түмэн торго” брэндийн эмэгтэй дээл 250.000-1.049.000 төгрөгийн үнэтэй байна. Эрэгтэй дээл 300.000-1.049.000 хүүхдийн дээл 199.000-249.000 төгрөгийн хооронд худалдаалж байна. “Түмэн торго” дээл халаас, загварлаг эсгүүр хийцээрээ хэрэглэгчдийн таашаалд нийцдэг.

Эмэгтэй дээл - 250.000-1.049.000 төгрөг

Эрэгтэй дээл - 300.000-1,049.000 төгрөг

Хүүхдийн дээл - 199.000-249.000 төгрөг

“Тосон торго”

Торгон материал, гар урлалын нарийн чимэглэлтэй “Тосон торго” брэндийн дээл 680.000-2.800.000 төгрөгөөр худалдаалж байна. Энэхүү брэндийн дээл хүндэтгэлийн арга хэмжээ, хурим ёслолд зориулагдсан загвар гэдгээрээ онцлог.

“Bloom Wear”

“Bloom wear” брэнд дээл залуу эмэгтэйчүүдийн чиг хандлагад нийцсэн, орчин үеийн эсгүүртэй зориулсан дээл худалдаалдаг. Загвар, хэв маягаас хамаарч 465.000-520.000 төгрөгийн үнэтэй. Өнгө, хийц нь минимал хэв маягтай, өдөр тутамд өмсөхөд тохиромжтойг хэрэглэгчид онцолдог.

“ТUVZA”

Энэхүү брэндийн дээл корсет буюу бүсэлхийгээрээ барьдаг тусгай оруулгатай буюу хатуулгатай.  Загвар, материалаас хамаарч 420.000-720.000 төгрөгийн үнэтэй. Албан ёсны арга хэмжээ, хурим, ёслолын үед өмсөхөд тохирмжтой.

“UV”

Үндэсний хувцасны зах зээлд ховор хийц, дээд зэрэглэлийн чанараараа ялгардаг брэнд. Тус брэндийн дээлүүд 898.000-1.300.000 төгрөгийн үнэтэй. Чимэглэл, материалын хувьд дээд зэрэглэлд тооцогддог бөгөөд хүндэтгэлийн болон ёслолын зориулалттай загвартай.

Залуусын дунд “даашинз хэлбэрийн дээл” моод

Сүүлийн хоёр жилд залуу эмэгтэйчүүдийн дунд даашинзны загвартай, сул уналттай, халаастай, товчгүй дээл онцгой эрэлттэй болсон. Эдгээр дээл нь уламжлалт болон орчин үеийн хэв маягийг хослуулсан, гоёмсог хэрнээ өдөр тутамд өмсөхөд тохиромжтой.

Хантааз, малгай зэрэг гоёл чимэглэл, нэмэлт хэрэгслүүдийн үнэ дунджаар 50-250 мянган төгрөгийн хооронд хэлбэлзэж байна.