Зүлэг ногоон дэвжээн дээрээ хүчит бөхчүүд нь барилдаж, цэлгэр сайхан нутагт нь хурдан морьд уралдаж, уухайн дуунд цэц мэргэн харваачид нь сум тавьсан Монгол наадам эхлэхэд хэдхэн хоног дутуу байна. Үндэсний их түүх, баялаг уламжлалаараа бахархаж, хойч үедээ дамжуулан өвлүүлэх бахархалт өдрүүд билээ. Үндэсний их баяр наадмаараа бид дээл гоёлоо өмсөж, угсаатан бүр өөрсдийн өв соёлоо таниулдаг билээ. Үндэсний их баяр наадам дөхсөнтэй холбоотойгоо дээл гоёлын үнэ, загварын талаар мэдээлж байна.

           Энэ жилийн наадмын дээлний онцлох гоёл нь бүс бөгөөд бүсний гоёл, унжлага, урт хээтэй бүстэй дээлүүд илүү чамин харагдах аж. Мөн торгон болон уналттай материалтай дээлүүдийг хүмүүс ихээр сонгож байгаа гэнэ.

“ТҮМЭН ТОРГО” БРЭНДИЙН ДЭЭЛ 299-1 САЯ ТӨГРӨГИЙН ҮНЭТЭЙ БАЙНА

       Монголчуудын нийтээр сонгон үйлчлүүлдэг “Түмэн торго” брэндийн энгийн дугуй хээтэй дан дээл 299 мянган төгрөг,  энгийн торгомсог болон хатгамалтай дээл нь 499-539 мянган төгрөгийн үнэтэй байлаа. Гар чимэглэл, хүр хорхойн торгон  дээл 829-1 сая төгрөгийн үнэтэй худалдаалагдаж байна. Тус брэндийн эрэгтэй, эмэгтэй монгол цамц 129-249 мянган төгрөгийн үнэтэй.

“ӨВ”, “WE BRAND”-ИЙН ДЭЭЛ

      Охид, бүсгүйчүүдийн сонгож үйлчлүүлдэг “Өв”, “We brand”-ийн дээлний үнэ ханшийн талаар сонирхлоо. “Өв” брэндийн 125-795 мянган төгрөгийн үнэтэй байна. Энгийн даавуун дээл 125 бол чимэглэлтэй, торгон дээлний үнэ 595-795 мянган төгрөг гэнэ. Харин “We brand”-ийн энгийн дээлний үнэ 185 мянган төгрөгөөр эхлэх бол хүр хорхойн дээл 998-1,2 сая төгргийн хооронд худалдаалагдаж байна.

       Сүүлийн жилүүдэд тренд болоод буй торон ханцуйтай, сувдан чимэглэлтэй захтай дээлний үнэ 488 мянган төгрөгөөс эхэлж байлаа. Харин торон ханцуйтай дээлний үнэ 95 мянган төгрөгөөс эхэлж байв.

 ХАНТААЗ ЗАГВАРААСАА ШАЛТГААЛАН 85-289 МЯНГАН ТӨГРӨГИЙН ҮНЭТЭЙ БАЙНА

                Торон даашинз дээр монгол хантааз өмсөх нь энэ жилийн бас нэгэн мода болоод байгаа билээ. Тэгвэл тус имжийг бүрдүүлэх хантаазны үнэ нь 85 мянган төгрөгөөс эхэлж байлаа. “Түмэн торго” брэндийн эмэгтэй хантааз 140-250 мянган төгрөг бол “Дээд” брэндийн хантааз 98 мянган төгрөг, “SONN UP” брэндийн урт хантааз 289 мянган төгрөг гэж байв.

Дээлтэй загварлаг харагдахад тусалдаг бүсний үнэ 25 мянган төгрөгөөс эхэлж байна. Даалин эмэгтэй бүс загвараасаа хамаараад 60-95 мянган төгрөгийн үнэтэй бол эрэгтэй даавуу болон торгон бүсний үнэ 35-120 мянган төгрөгийн үнэтэй байлаа. Үсний уут загвараасаа хамаараад 15-25 мянган төгрөгөөр худалдаалагдаж байна.Энгийн хромон гутал 200-350 мянган төгрөг бол монгол гутал 3.5 сая хүртэлх үнэтэй байлаа.

ҮНДЭСНИЙ ЗҮҮСГЭЛ ГОЁЛЫН БЭЛГЭДЭЛ

            Дээл хээ хур нь тус өөр бэлгэдэлтэй байдаг билээ. Түүнчлэн эрт дээр үед хүүхдэд хээ хуар бүхий дээл өмсөхийг цээрлэдэг байжээ. Геометрийн дүрс бүхний зураасан хээ: Энэхүү торгон дээлийн хээ нь усны долгион мэт харагдах бөгөөд гал, цахилгаан, уул, үүл, солонго зэргийг бишрэн гайхаж байсан хамгийн эрт цаг үед үүссэн байгалийн үзэгдлийн хээг агуулжээ

    Гинжин хээ: Хүч чадал, хүсэл зориг, эрч хүчийг бэлгэддэг

    Цэцгэн хээ: Гоёмсог, дур булаам өнгө үзэмж, урин дулаан уур амьсгал, ариун тунгалаг байдал, өсөж үржихийн бэлгэдэл

    Үүлэн хээ: Энэхүү хээ нь хязгааргүй эрх чөлөө, баялаг, хүн бүр аз жаргалтай аж төрөхийг бэлгэднэ

ДЭЭЛИЙН ЦЭЭРЛЭХ ЁС

•     Монгол хүн дээлийн захыг хийморь гэж үздэг тул захан дээр гишгэх, уруу харуулан тавихыг цээрлэдэг. Хуучирч хэрэггүй болсон дээл хувцасны захыг ханзалж аваад хаядаг.
•     Бүс малгайндаа хийморь байдаг гэж үздэг тул хүний бүс, малгайн дээгүүр алхахыг цээрлэнэ.
•     Дээлийн ханцуйг хүч, санааны бэлгэдэл гэж үздэг тул тайлж тавихдаа ханцуйгаа бүсэндээ уяж орхидог. Ханцуйг сул хоосон орхихыг цээрлэдэг.
•     Дээлийн ханцуйг дотогш нугалж шамлахыг цээрлэдэг. Энгэр заамаа задгайлж айлд орох, хүнтэй уулзахыг цээрлэнэ. Энгэр задгай хүнтэй таарсан хүн “Хэнтэй гар зөрүүлэх нь вэ?” гээд уулзахгүй явдаг.
•     Ах зах хүн, эцэг эхийнхээ дэргэд эмэгтэй хүн уужаа тайлах, эрэгтэй, эмэгтэй ямар ч хүн дотоод энгэр задгайлдаггүй.
•     Ахмад буюу албаны хүний дэргэд дээл сугалдаргалах, хормой шуухыг цээрлэдэг.
•     Бүсээ бусдын эхнэрээр бүслүүлэх, нар буруу эргүүлж бүсэлж, тайлахыг цээрлэнэ.
•     Давхар малгай өмсдөггүй. Хоёр эхнэр буюу  хоёр нөхөртэй болохын ёр гэдэг.
•     Гутлын түрий эргүүлэхийг муу ёр гэж үздэг. Учир нь “Хонгор азарга” гэдэг эрүү шүүлтэд оруулах хэрэгтний гутлын түрийг эргүүлдэг байжээ.
•     Гутлын улыг бурхан шүтээн рүү харуулж тавьдаггүй.
•     Малгайг хүнд бэлэглэдэггүй. Уруугаа харсан сав тул буян хишгээ асгана гэж үздэг. Хүнээс малгай бэлэгт авах бол бэлгэдлээр хэдэн ч хамаагүй багахан мөнгө өгч байж авдаг.
•     Гэрт, гадаа хаа ч эмээлийн бүүргийг буруу харуулж тавьдаггүй.
•     Хутга мэсээр газар бүлдэггүй. Амандаа зуудаггүй.
•     Хайчны амыг хоосон ангалзуулдаггүй. Чонын ам ширүүсэж мал хорогдоно гэдэг.
•     Дээлийн зах, гутлын түрийг гал руу харуулж тавьдаггүй.
•     Сампин хоосон эргүүлдэггүй. Өрөнд орно гэж цээрлэдэг.