“Никитон” хамтлагийн дуучин Б.Батчулуун, дуучин С.Сэрчмаа нар нийгмийн сүлжээнд хүчингийн гэмт хэргийн шинжтэй хэргийг онигоо болгон ярьсан нь олон нийтээс шүүмжлэл дагуулаад буй. Тэднийг "Ёс зүйгүй үйлдэл гаргалаа" хэмээн хамтран ажиллаж буй зарим байгууллагууд гэрээгээ цуцалж эхэлсэн билээ. Мөн энэ хэрэгтэй холбоотойгоор дуучин Б.Батчулуун буюу Баачкаг цагдаагийн байгууллагаас шалгаж эхэлсэн гэх мэдээлэл бий. 

Энэ талаар Цагдаагийн ерөнхий газрын Хэвлэл, мэдээллийн төвийн дарга Б.Баатархүүгээс тодруулахад “Нийгмийн сүлжээнд гэмт хэргийн чанартай зүйл ярьсан “Никитон” хамтлагийн дуучин Б.Батчулууныг шалгаж байна. Үнэхээр гэмт хэрэг үйлдэгдсэн эсэхийг шалгах нь бидний үүрэг. Одоогоор шалгалтын дүн гараагүй учир мэдээлэл өгөх боломжгүй” гэлээ.