Улсын хэмжээнд сүүлийн өдрүүдэд коронавирусийн халдвар эрчимтэй тархаж байна. Өдөр ирэх тусам халдвар авсан иргэдийн тоо ихсэж буй энэ өдрүүдэд олны танил цөөнгүй эрхмүүд халдвар авчээ. Түүний нэг “Нүдэн сондор”, “Бэрүүд”, “Содура” зэрэг дэлгэцийн уран бүтээлд гол болон туслах дүрийг чадварлаг бүтээсэн жүжигчин О.Амгаланбаатар коронавирусийн халдвар тусч, биеийн байдал нь хүнд байна. Тэрбээр энэ тухайгаа  “Коронавирусийн халдвар уушгинд хүрч, хатгаа болсон байдалтай хүнд туслаа. Одоо ХӨСҮТ-д хэвтэн эмчлүүлж байна.

Ойрын өдрүүдэд болсон үйл явдлаас эрүүл мэнд эрхэм баян гэсэн үгийн үнэ цэнийг уушгиндаа тулгаж ухаарлаа.

Материаллаг зүйл, махан биеийн хэрэгцээнээс илүү ухамсар, ухааны тал дээр нийгмээрээ анхаарах ёстой санагдлаа. Энэ коронавирус чинь хүндхэн тусвал зүгээр нэг ханиад биш байна. Толгой асар хүчтэй өвдөж, амьсгал давчдаад тун хүнд байна.

Энгийн нэг ханиадыг л дэлхий нийтээрээ цар тахал гэж сүржигнэхгүй байлгүй дээ. Энд эмч нар эрвийх, дэрвийхээрээ хүч хүрэлцэхгүй ч хичээж байна. Эсэн мэнд эргэн уулзахын тулд идэвхитэйгээр вакцинаа хийлгээрэй” гэлээ.