Цахим сүлжээнд ерөнхий боловсролын сургуулийн сурагчид нэгнийгээ зодож, дээрэлхэж байгаа бичлэг цацагдсан. Тус бичлэгтэй холбоотойгоор 130 дугаар сургуулийн дээрэлхэлтэд  өртсөн сурагчдын эцэг эхийн төлөөлөл мэдээлэл өгч байна.

Тэрбээр “Манай хүүхдийг зодсон хүүхдийн эцэг эх нэг кальци өгчхөөд явсан. Эхлээд эрүүгийн хуулиар явсан ч 16 нас хүрээгүй гээд иргэний шүүх рүү шилжсэн. Сургуулиуд үе тэнгийн дээрэлхэлтийн асуудалд сул ханддаг. Би арваннэгдүгээр сард нийгмийн ажилтантай нь уулзсан. Тоодоггүй юм билээ. Арваннэгдүгээр сард манай хүүхдийг ангийнх нь хүүхдүүд нөгөө ангийн хүүхэдтэй зодолд гэж хэлсэн юм билээ. Зодолдохгүй бол аймхай гэж хэлнэ. Аймхай биш гэдгээ батлахын тулд ариун цэврийн өрөөнд орж зодолдсон. Нөгөө хүүхэд нь бөхийн удамтай хөдөлгөөнтэй хүүхэд байсан учраас манай хүүхдийг унагааж, бэртээгээд хөл, гарыг нь хугалсан учраас эмнэлэгт хэвтэж, хадуулсан. Тухайн үед камер шалгасан, ангийн багш болон сургуулийн захиргаанаас тоогоогүй. Нийтээр нь хурал хийнэ гэж ярьсан ч хийгээгүй” гэлээ.