Гал морин жилийн сар шинийн босгон дээр салбар салбарын олон сайхан хүн хөдөлмөр, зүтгэлээ төрдөө үнэлүүлж байна. Энэ үеэр Монгол Улсын Соёлын гавьяат зүтгэлтэн, зохиолч, сэтгүүлч, шүүмжлэгч, доктор, профессор Т.Баасансүрэн Ардын багш цол хүртлээ.

Ховд аймгийн Цэцэг сумын уугуул тэрбээр М.Ломоносовын нэрэмжит Москвагийн Улсын их сургуулийг сэтгүүлч мэргэжлээр төгсөж, улмаар 1982 онд ОХУ-ын Нийгмийн ухааны академид докторын зэрэг хамгаалсан байдаг.

Ажилласан байдал: 

• 1974-1976 онд МАХН-ын "Үнэн" сонинд сурвалжлагч,
• 1976-1979 онд МАХН-ын Төв хорооны нарийн бичгийн даргын туслах,
• 1979-1982 онд ЗХУ-ын Коммунист Намын Төв хорооны дэргэдэх Нийгмийн ухааны академид сурч дэд докторын зэрэг хамгаалсан.
• 1982-1984 онд МАХН-ын Төв хорооны Үзэл суртлын хэлтсийн Соёлын тасгийн эрхлэгч,
• 1984-1987 онд Улсын Гэрэл зургийн газрын дарга,
• 1987-1990 онд Монголын сэтгүүлчдийн Холбооны орлогч дарга,
• 1990-1991 онд ХААИС-ийн МАХН-ын Хорооны дарга,
• 1991-1992 онд Монголын Хэвлэл мэдээллийн ажилтан ажилчдын ҮЭ-ийн холбооны дарга бөгөөд Улсын Гэрэл зургийн газрын дарга,
• 1992-1996 Монгол Улсын Их Хурлын Хэвлэл мэдэллийн албаны дарга,
• 1996-1996 онд МОНЦАМЭ мэдээллийн агентлагийн орлогч захирал,
• 1996 онд МАХН-ын Удирдах зөвлөлийн ХЭГ-ын дарга, МАХН-ын Хэвлэл мэдээлэл, гадаад харилцааны хэлтсийн дарга
• 2000 оны есдүгээр сараас 2004 оны хавар хүртэл МОНЦАМЭ агентлагийн захирал,
• 2002 оны арванхоёрдугаар сараас 2006 оны арваннэгдүгээр сар хүртэл Монгол Улсаас Польш Улсад суугаа Элчин сайд. (Украин, Эстони, Латви, Литв улсад хавсран суугаа Элчин сайд).
• 2007-2008 онд Ерөнхий сайд Миеэгомбын Энхболдын Хэвлэл мэдээлийн хэлтсийн дарга,
• 2009-2011 онд Монголын Сэтгүүлчдийн Холбооны (МСХ) Ерөнхийлөгч,
• 2012 оноос -2020 онд "ТВ-9" телевизийн захиралаар тус тус ажилласан байна.

• “ХХ зууны эхэн үеийн Монголын чөлөөт хэвлэл”, УБ 2009
• “Алтай” тууж,өгүүллэг
•  “Анхны пионерийн бүрээн дуу” ном.
• “Монетон бөгж”, “Дэнгийн цагаан эрвээхэй”, “Тал” зэрэг 100 гаруй өгүүллэг, “Нүдэн булаг”, “Өвгөн цохио” зэрэг уянгын 10 гаруй тууж,  “Тэрбумтан”, “Уулс, үүлс, туульс” /I ба II дэвтэртэй/ хэмээх роман бичжээ.

        Түүний тууж, өгүүллэгүүд “Монголын уран зохиолын дээжис-108 боть”-ийн 71 ба 82 дугаар боть болж тус тус хэвлэсэн байдгийг уншигчдад нь андахгүй мэддэг. Түүний зохиол, бүтээлийг олон сайхан эрдэмтэн судлаачид онцлон тэмдэглэж, магтан сайшаасан байдаг. Тухайлбал, Монголын хүүхдийн нэрт зохиолч Д.Содномдорж Т.Баасансүрэнгийн “Монетон бөгж” өгүүллэгийнх нь талаар “Утга зохиол, урлаг” сонинд тусгайлан шүүмж бичиж бүхэл бүтэн туужийн уянгын санааг ганцхан өгүүллэгт нэн чадмагаар зангидан багтааж чадсан нь гайхалтай гэсэн байдаг.

        Мөн Утга зохиолын нэрт шүүмжлэгч Х.Сампилдэндэв түүний “Ятуу намнагч”, “Хүлээсэн нь”, “Бутач”, “Хатиг”, “Туулай буюу баавгай”, “Дэлхий минь, өлгий минь”, “Амьдрал, тэмцлийн шивнээ”, “Хос гариг”, “Алтан загасны үлгэр” зэрэг өгүүллэгт анализ хийж өндрөөр үнэлсэн бол Оросын эрдэмтэн, утга зохиолын судлаач Л.Герасимович өөрийн судалгааны номондоо Т.Баасансүрэнгийн “Хүлээсэн нь”, “Өрхийн тэргүүлэгч”, “Нөхдийнхөө төлөө баярлаж явна”, “Төрсөн өдрийн бэлэг” өгүүллэг нь хүн, хүний амьдралын утга учир, учгийг нарийн чадмаг дүрсэлж үзүүлжээ хэмээн онцолж тэмдэглэсэн байна. ​