Английн Диана гүнжийн хэрэглэж байсан ховор эд зүйлсийг энэ сард дуудлага худалдаагаар худалдахаар болсныг Julien’s Auctions албан ёсоор зарлалаа. Дуудлага худалдааг долдугаар сарын 26-нд АНУ-ын Лос Анжелес хотын The Peninsula Beverly Hills зочид буудалд зохион байгуулах бөгөөд “Princess Diana’s Style & A Royal Collection” нэрийн дор 100 орчим хувцас хэрэглэл, эд зүйлсийг дуудлага худалдаагаар зарах ажээ. Тус дуудлага худалдаагаар Диана гүнжийн “Dior” брэндийн гар цүнх, цанын хувцас, цэцгэн хээтэй даашинз зэргийг худалдаалах ажээ. Julien’s Auctions-ийн гүйцэтгэх захирал Мартин Нолан “Диана гүнжийн хамгийн том дуудлага худалдаа” хэмээн тодотгож, дэлхийн цуглуулагчдын анхаарлыг ихээхэн татаж буйг онцолжээ.