Улаанбаатар хотод авто замын түгжрэл нийтийн тээврийн хүрэлцээ тулгамдсан асуудал болоод удаж байна. Нийслэлээс түгжрэлийг бууруулахтай холбоотой хэд хэдэн арга хэмжээ авч буйн нэг нь нийтийн тээврийн хүрэлцээг нэмэгдүүлэх байв. Гэвч он дууссан хуучин автобус оруулж ирсэнтэй холбоотой нийтийн тээврийн асуудал бүрэн шийдэгдээгүй байна. Мөн түгжрэлийг бууруулах хүрээнд төлбөртэй бүс байгуулах хуулийн төсөл Нийслэлийн Засаг дарга болон Түгжрэлийг буруулах үндэсний хорооноос УИХ-д оруулж, хэлэлцүүлж байгаа юм.Мөн нийслэлд өчигдөр авто замын ачаалал эрс ихсэж, иргэдийн бухимдлыг төрүүлсэн билээ. Түгжрэлийг бууруулахад төлбөртэй бүс байгуулах болон нийтийн тээврийн хүрэлцээний талаар иргэдийн суурийг сонслоо.

      Иргэн С.Донгообор: Өчигдөр авто замын түгжрэл эрс нэмэгдэж, гэртээ оройтож харьсан. Гэр рүү явахаар 19:00 цагт Мөнгөн завьяагийн автобусны буудлаас автобусанд сууж Баянхошуу руу бүтэн дөрвөн цаг түгжрээд 23:00 цагт гэртээ очсон. Түгжрэлийг бууруулахын тулд жолооч бүр ухамсартай, соёолтой, бие биедээ үндлэлтэй, дүрмээ сайн ойлгон дагаж мөрддөг баймаар байна. Замын хөдөлгөөнд соёлтой оролцвол түгжрэл харьцангуй буурна гэж боддог.

      Иргэн Б.Ариунжаргал: Ажлаа тараад гэртээ харихын тулд бараг таван цаг түгжрсэн.  Автобусны хүрэлцээ боломжийн байгаа ч түгжрэл их. Цаашид дугаарын хязгаарлалтыг сайн хянаж чадвал түгжрэл буурна гэж бодож байна. Харин хотын төв рүү орохдоо автомашин төлбөр төлөх саналыг дэмжихгүй байгаа.

      Иргэн Б.Цэцэгээ: Өчигдөр түгжрэл их байсан. 20:00 цагт ажлаа тараад 00:00 цагт гэртээ харьсан. Автобус хүйтэн хүрэлцээ муу байгаа. Төлбөртэй зогсоол гаргаад түгжрэл арилахгүй харин дээгүүр явдаг хурдны гүүр барих хэрэгтэй байгаа юм. Олон улсын жишигийг дагаад төлбөртэй зогсоолтой болсон ч түгжрэл арилахгүй. Замаа сайн засаж, эвдэрсэн замуудаа ойр ойрхон засаж сайжруулах шаардлага байна.

      Иргэн Г.Оюундарь: Замын түгжрэл одоогийн байдлаар утгаа алдаж, замбараагүй болсон. Дугаарын хязгаарлалт болон тэгш, сондгойгоор явуулахыг сайжруулах хэрэгтэй. Олон улсын жишгийг дагасан хотын төв рүү төлбөр төлж нэвтрэхийг дэмжихгүй байна.

      Иргэн Б.Солонгожаргал: Өчигдөр 21:00 цагийн үед Хорооллын эцсээс гэртээ харихаар автобус хүлээсэн боловч автобус ирээгүй. Автобусны хүрэлцээ хангалтгүй байдаг. Боломжтой үедээ таски барьдаг. Тиймээс түгжрэлийг бууруулахын тулд метротой болох хэрэгтэй байгаа юм. Авто машинтай иргэд хотын төв рүү төлбөртэй орох нь хүндрэлтэй. Яагаад гэвэл  төлбөр төлж зорчих боломжгүй хүмүүс их байгаа. Үнийн өсөлт их, цалин бага энэ үед энэ шийдвэрийг дэмжихгүй байгаа