Соёлын яамныхан арваннэгдүгээр сарыг “Соёлын бүтээлч сар” болгон, жил бүр соёлын арга хэмжээ зохион байгуулдаг. Тиймээс “Оранж энтертэйнмент”-ийн хамт олон соёлын яамныхан "Соёлын бүтээлч сар" аяны хүрээнд “Шар гэгээ” УСК-г хууль бусаар худалдан борлуулж, аймаг, сумын соёлын төвд гаргаж байна" гэх мэдэгдэл гаргажээ. Харин энэ талаар Соёлын яамны Соёлын бодлогын хэрэгжилтийг зохицуулах газрын дарга Д.Наранцэцэгээс тодруулахад “Манайх “Соёлын бүтээлч сар” аяны хүрээнд олон нийтэд кино үзүүлнэ. Ингэхдээ эрх бүхий хүмүүсээс зөвшөөрөл авч, хууль, журмын дагуу бусдын бүтээлийг олон нийтэд үзүүлнэ. Харин дээрх асуудал Сүхбаатар аймгийн Асгат суманд гарсан. Тодруулбал, тус сумын соёлын төвийнхөн “Шар гэгээ” киног соёлын төвд үзүүлнэ” гэх зарлал олон нийтийн сүлжээнд оруулсан юм билээ. Түүнийг нь аймгийнх нь Соёл урлагийн газрын дарга нь зарыг буцааж, иргэдэд кино үзүүлээгүй гэсэн. Тиймээс тус сумын соёлын төвийнхөн хариуцлагагүй хандаж, алдаа гаргасан гэсэн үг. Харин тэдний оруулсан зарыг "Оранж энтертэйнмент"-ийнхан харчихаад мэдэгдэл гаргасан байна” гэсэн юм.

     Харин олон нийтийн сүлжээнд зарлал оруулсан Асгат сумын Бүртгэл мэдээллийн санч Т.Сумъяазагдаас тодрууллаа. Тэрбээр “ Манай соёлын төв “Соёлын элч” аяны хүрээнд “ДДЭШ” ХХК-тай гэрээ байгуулж, “Шидтэй шинэ төхөөрөмж” багцыг суулгасан. Тэднийхээс кино долоо хоног аяны хүрээнд “Хөх нуур”, “Плаш” киног иргэдэд үзүүлж болно” гэсэн юм. Тэгээд намайг кино багц руу нь орж үзэхэд “Шар гэгээ” УСК орчихсон байхаар нь адилхан төлбөр төлөх юм байна гээд “Шар гэгээ”-г үзүүлэхээр шийдээд зарлал оруулчихсан байсан. Тэгээд дөрвөн цагийн дараа аймгийн болон Соёлын яамны удирдлагуудаас ярьж, анхааруулсан учир зарлалыг цуцалж, тухайн өдрийн арга хэмжээг цуцалсан. Тэгэхээр иргэдэд “Шар гэгээ”-г үзүүлж, орлого олоогүй. Надад арга хэмжээ авна гэсэн. Одоогоо ямар арга хэмжээ авахыг мэдэхгүй байна” гэв.