Гаалийн ерөнхий газраас хамтарсан тусгай ажиллагааны талаар мэдээлэл хийлээ. Энэ үеэр Зөрчилтэй тэмцэх аюулгүй байдлын газрын дарга Ж.Эрдэнэболд мэдээлэл өгсөн юм.

             Тэрбээр  “Гаалийн байгууллага нь улсын хилээр нэвтрүүлэхийг хориглосон болон хязгаарласан барааны хууль бус эргэлттэй тэмцэх, худалдааны луйвар, татвараас зайлсхийх хэрэг, зөрчилтэй тэмцэх ажлын хүрээнд 2023 оны эхний аравдугаар сарын байдлаар нийт 1578 зөрчлийг илрүүлж, зөрчилд холбогдох зохих татварыг нөхөн төлүүлж торгуулийн арга хэмжээ авч ажиллаж байна. Үүнээс 32 үйлдэл нь  гэмт хэргийн шинжтэй үйлдэл байсныг холбогдох хууль, хяналтын байгууллагад шалгуулахаар шилжүүлсэн. Монгол Улсын хил дээр эд зүйл нэвтрүүлэхийг завдсан хэрэг зөрчлөөс 17 удаагийн үйлдлээр таван нэр төрлийн 2630 хүн тун мансуурал эм, сэтгэлд нөлөөлөх эм хууль бусаар нэвтрүүлэхийг завдсаныг таслан зогсоосон. Хоёр удаагийн үйлдлээр нийт 4591 грамм буюу 4,6 кг алтан гулдмайг Монгол Улсын хилээр хууль бусаар гаргах гэж байсныг таслан зогсоосон. Мөн зургаан удаагийн үйлдлээр түүх соёлын өв, дурсгалт зүйлийг хилээр гаргах гэж байсныг, нэг удаагийн үйлдлээр 375 кг химийн бодисыг  мэдэгдэлгүйгээр хилээр нэвтрүүлэх гэж байсныг зогсоосон. Монгол Улс нь ОХУ-тай хил залгаа  10 боомт, БНХАУ-тай хил залгаа 13 боомт, агаарын нэг боомт гээд нийт 24 боомт болон 160 орчим гаалийн бүсэд 1700 орчим хяналтын камерын байнгын ажиллуулдаг. Жишээ хугацаанд татвараас зайлс хийсэн 24 зөрчил, худал мэдүүлсэн , бараа нуун дарагдуулсан зөрчлийг илрүүлж, 246842 төгрөгийн татвар, торгуулийг төлүүлж, улсын орлого босгосон. Гаалийн зөрчилтэй тэмцэх, аюулгүй байдлын газар болон Хяналтын нэгдсэн төвөөс сүүлийн нэг сарын хугацаанд харьяа гаалийн хороодод мэргэжлийн арга зүйн дэмжлэг үзүүлэх, гаалийн зөрчлөөс урьдчилан сэргийлэх зорилгоор "Төв" ажиллагааг хэрэгжүүлж ажиллаж байна. Энэ ажиллагааны гаалийн бүрдүүлэлтийн 0,42 хувьд онилгоо хийж дахин болон хамтарсан хяналт шалгалт хийж ажиллахад нийт онилгооны 70,3 хувьд нь зөрчил дутагдал илэрлээ.Энэ зөрчилд татвараас зайлс хийх, худалдааны луйвар, хориглосон барааг нэвтрүүлэхийн завдсан байдаг.  Дээрх нөхцөл байдлаас үндэслэн гаалийн байгууллагаас цаашид хууль бус барааны эргэлттэй тэмцэх, худалдааны луйвар, татвараас зайлсхийх явдлаас урьдчилан сэргийлэх, таслан зогсоох ажлыг сайжруулах зорилгоор  сэжигтэй гаалийн бүрдүүлэлт, бараа, тээврийн хэрэгсэлд хийх онилгоо, дахин шалгалтыг нэмэгдүүлэн ажиллана” гэв.