УИХ-ын чуулган хуралдаж байна.  Хуралдаанаар Монгол Улсын нэгдсэн төсвийн 2024 оны төсвийн хүрээний мэдэгдэл, 2025-2026 оны төсвийн төсөөллийн тухай хуульд өөрчлөлт оруулах тухай хуулийн төслийг хэлэлцэж байна. Энэ үеэр УИХ-ын гишүүн,  Барилга хот байгуулалтын сайд Ц.Даваасүрэн үг хэллээ.

        Тэрбээр “УИХ-аар 2024 оны төсөл хэлэлцэж байгаатай холбогдуулж үг хэлье. Төсвийн хэлэлцүүлэгтэй холбоотойгоор тойрогтоо ажиллаа. Ер нь иргэдийн оролцоог хангах ёстой. УИХ-ын гишүүний хувьд иргэдийн хэлсэн зүйлсийг дамжуулж хэлье. Хөдөө зайлшгүй шийдэх ёстой зүйлс байна. Малын түүхийн эдийн боловсруулах асуудал дээр анхаарах хэрэгтэй гэдгийг иргэд хэлж байна. Хүүхдийн дотуур байрны хоолны зардал 4000 төгрөг байгаа. Хоёр хуушуурын үнээр биднийг гурван удаа хоол өг гэдэг зүйл ярьсан энэ байж болох уу гэсэн. Бодоод үзэхэд энэ үнэн байна. Бид 4000 төгрөгөөр хоол идэж чадах уу. Мөн цэцэрлэгийн хоолны зардал 2400 байгаа. Тиймээс бодит амьдралд нийцээгүй зүйлсийг шийдэж өгөөч гэсэн. Бид төсвийн хэлэлцүүлэгт иргэдийн оролцоог хангах хэрэгтэй. УИХ-ын даргаас иргэдийг гишүүдтэйгээ уулзаж, саналыг сонсохоор зохион байгуулж өгөөч гэж хүсэж байна.Нийгмийн бухимдал дээ цэгтээ хүрсэн байна. Хөдөө уулзалт хийхээр дандаа 45-аас дээш насныхан байдаг. Орон нутаг залуучуудаар дутагдаж байна. Иргэдээ сонсоод төсвөө хэлэлцээсэй гэж хүсэж байна.