Хэнтий аймгийн Цэнхэрмандал сумын нутагт энэ сарын 9-10-нд шилжих шөнө 01:00 цагийн үед тус сумын ерөнхий боловсролын сургуулийн есдүгээр ангийн сурагч болох 13-14 насны таван  хүүхэд “Камри” маркийн тээврийн хэрэгсэл жолоодож, замын хөдөлгөөнд оролцсон зөрчил гаргажээ. Урьдчилсан байдлаар иргэн С-ийн эзэмшлийн тээврийн хэрэгслийг хүү нь болох 13 настай Б нь “хөгжим сонсоно” гээд түлхүүрийг авч гарсан нь тогтоогдсон байна. Хүүхдүүд архи, согтууруулах ундааны зүйл хэрэглээгүй. Иймд эцэг эх, асран хамгаалагч, насанд хүрэгч, тээврийн хэрэгсэл эзэмшигч та бүхэн насанд хүрээгүй хүүхдэд болон бусдад жолоо шилжүүлэхгүй байх, тээврийн хэрэгслийн осол гарахаас сэргийлэхийг цагдаагийн байгууллагаас сэрэмжлүүлж байгаа билээ.

    Бид насанд хүрээгүй 13 настай хүүг ямар хэргээр автомашин жолоодож явсан болохыг түүний ааваас нь тодрууллаа. Тэрбээр “Хүү өчигдөр шөнө машинд хөгжим сонсоно гээд надаас түлхүүр авсан юм. Гэтэл намайг унтсан хойгуур ангийнхаа дөрвөн хүүхдийг суулгаад явчихсан байна лээ. Засмал зам дээр машин барьж үзээгүй. Ангийнхаа хүүхдүүдтэй нийлж, сонирхоод унасан байх. Тэдний ард явсан жолооч бичлэг хийж, цагдаад мэдэгдсэнээр шөнийн 02:00 цагт надад цагдаа нар мэдэгдсэн. Тэдэнтэй хамт явсан нэг нь цагдаагаас зугтаасан учир түүнийг барьж иртэл шөнөжин цагдаагийн газар байлаа. Тэд чухам ямар зорилготой хаашаа явж байсныг нь мэдээгүй” гэв.