Баянзүрх дүүргийн 21, 27 дугаар хороо Дарь-Эх орчимд үер бууж, таван хүн амь эрсдсэн талаар бид өмнө нь мэдээлсэн. Тодруулбал, нийслэлд орсон түр зуурын борооны улмаас Дарь-Эх орчим үерт автаж, арван сартай нярайтайгаа автомашинд зорчиж явсан гэр бүлийн хүмүүс үерт урсаж, хүүхэд нь эндсэн харамсалтай нь хэрэг гарсан. Талийгаач хүүхдийн аав, ээжийн биеийн байдал хүнд Гэмтэл согог судлалын үндэсний төвд хэвтэн эмчлүүлж байна. Хүүхдийн цогцсыг машин урссан газраас нэг км орчмын зайнаас буюу гүүрэн доороос олж, шүүх шинжилгээний хүрээлэнд хүлээлгэн өгсөн байдаг. 10 сартай талийгаач хүүхдийн аав, ээжийн биеийн байдал ямар байгаа талаар иргэн Б-гээс тодрууллаа. Тэрбээр “Үерт урсаж амиа алдсан хүүхдийн аав, ээж эмнэлэгт хэвтэн эмчлүүлж байгаа. Эмчилгээ хийлгэж байгаа болохоор өдөр, хоногоор бие нь дээрдэх байх. Тэдэнд улсаас байр өгөх сурагтай байсан ч одоогоор мэдээлэл ирээгүй байна” гэлээ.