Барилгын салбарт улсын төсвийн хөрөнгөөр ирэх онд 824 төсөл хөтөлбөр, бүтээн байгуулалтын ажил хийгдэхээр байна. Тодруулбал, 824 төсөл арга хэмжээний 516 буюу 63 хувь нь он дамжин санхүүжих төсөл байна. Эндээс харахад 2020 онд 691 шинээр тусгагдсан бол 2021 онд 308 төсөл арга хэмжээ шинээр тусгагдаж бүтээн байгуулалтын ажлын улсын төсвийн хөрөнгө оруулалт буурсан үзүүлэлттэй харагдаж байгаа юм. Барилгын салбарт өнөөдрийн байдлаар нийт 73700 ажилчид ажиллаж байна.

Улсын төсвийн хөрөнгөөр хийж буй бүтээн байгуулалтын ажлууд багассанаар нөгөө талаасаа дотоодын барилгын материалын үйлдвэрлэл хумигдах, царцах, барилгын салбарт ажиллаж буй ажилчдын нийгмийн асуудалд хүндрэх гэх мэт олон сөрөг нөлөөлөл бий болох магадлалтай байгаа юм.
Цаашид бүтээн байгуулалтын ажлыг цар тахлын үед хэрхэн зохион байгуулах талаар яамнаас шаардлагатай судалгаануудыг хийж, барилгын талбайд мөрдөх зөвлөмж, аргачлалуудыг боловсруулаад байгаа аж. Мөн 90 хувиас дээш гүйцэтгэлтэй барилгын ажлуудыг эхлүүлэх, хамгаалалтын горим тогтоох шаардлагатай байгууллагуудын үйл ажиллагааг гүйцэтгүүлэх, Барилгын материалын худалдаа, тээвэрлэлтийг саадгүй явуулах шаардлагатай. Ингэснээр цаашид барилгын салбарт хийгдэх бүтээн байгуулалтын төсөв, хөрөнгө оруулалтыг багасгахгүйгээр, гүйцэтгэх боломжтой байна гэж үзэж байгаа аж.