Увс аймгийн Өндөрхангай сумын малчнаас боом өвчин илэрсэн гэх мэдээлэл бий. Энэ талаар тус сумын ЗДТГ-ын ажилтнаас тодрууллаа. Тэрбээх “Манай сумын 37 настай малчнаас боом өвчин илэрсэн нь тогтоогдсон. Өвчтөнийг энэ сарын 19-нд аймгийн Нэгдсэн эмнэлэгт хүргэсэн. Тухайн иргэн үхсэн үхрийн арьс өвчсөн юм билээ. Тиймээс үхрээс боом өвчин туссан гэж урьдчилсан байдлаар үзэж байгаа. Боом өвчин гарсан бүс, орчмыг тусгаарласан” гэв.

     Ташрамд дурдахад, одоогоор боом өвчин хүнээс хүнд дамжсан гэх мэдээлэл байдаггүй. Хүн халдвартай малын гаралтай бүтээгдэхүүнтэй харьцах, малын дутуу болгосон мах хэрэглэх зэргээр боом өвчнөөр өвчилсөн байдаг. Боом өвчний халдварын давлагаа эрчимжвэл маш олон тооны мал, амьтан үрэгдэх эрсдэлтэй байдаг аж.