Нэг эмэгтэй цахим хуудастаа “Хүү минь алга болчихлоо” хэмээн сэтгэгдэл бичсэн байдаг. Тодруулбал, тэрбээр 4-5 настай эрэгтэй хүүхдийн зураг тавьж, “Хүү минь дөнгөж сая алга болчихлоо. Хамт тоглож байсан хүүхдүүд нь “Машинтай хүн аваад явсан” гэж хэллээ. Би яг галзуурлаа. Над руу битгий залга хүмүүс ээ, гуйя” хэмээн бичсэн юм. Хүүгийн хаанаас алга болсон, хэзээ явсан, хэдэн настай гэх тодорхой мэдээлэл нь байхгүй ч иргэд байгаа байгаа газартаа хайж байсан билээ. Харин тус эмэгтэй 30-40 минутын дараа “Хүүгээ олчихлоо” хэмээн пост бичсэн юм.

        Энэ талаар ЦЕГ-ын мэргэжилтнээс тодруулахад “Цагдаагийн байгууллагад иргэн Э-ээс өчигдөр “Хүүхэд алга боллоо” гэх дуудлага мэдээлэл ирсний дагуу эрэн сурвалжлах шалгалтын ажиллагаа хийсэн. Шалгалтын үеэр иргэн худал дуудлага, мэдээлэл өгсөн нь тогтоогдсон тул Зөрчлийн тухай хуулийн 15 дугаар зүйлийн 2 дахь хэсэгт зааснаар 50 нэгжтэй тэнцэх хэмжээний төгрөгөөр нүүр номд худал мэдээлэл оруулсан эмэгтэйг торгож шийдвэрлэсэн” гэлээ.