“Торнэло” сайтаар дамжуулан тив хоорондын цомын аварга шалгаруулах шатрын багийн төрлийн тэмцээнийг өчигдөр зохион байгууллаа. Уг тэмцээнд манай орны өсвөрийн шатарчид Ази тивийг төлөөлөн оролцож, нэг ч хожигдолгүй тэргүүлэн, цомын эзэн болжээ.
Тухайлбал, ДШХДМ Э.Азжаргал, ДШХДМ Б.Тэнүүнболд, ДШХМД Л.Очирбат, ДШХДМ Д.Мөнхзул, ОУХМ Д.Батсүрэн нар Азийн тивийн бусад шатарчдын хамтаар оролцсон байна.
Уг тэмцээнийг Унгар Улсын тамирчин, шатрын их мастер Юдит Полгарын нэрэмжит зургаа дахь удаагийн “Глобал Чес” фестивалийн хүрээнд Европын шатрын нэгдэл болон Дэлхийн шатрын холбооны хөгжлийн сангаас хамтран зохион байгуулсан юм.