Санхүүгийн зохицуулах хорооноос “Найман шарга” төвд валют арилжаа эрхэлж буй иргэд, аж ахуйн нэгжийн үйл ажиллагаанд шалгалт хийлээ. Банк бус санхүүгийн байгууллагуудын үйл ажиллагаа хууль тогтоомжийн дагуу явагдаж байгаа эсэхийг хянаж, тусгай зөвшөөрөлгүй валют арилжаа эрхлэгчдийн үйл ажиллагааг зогсоох шалгалтыг Чингэлтэй дүүргийн Цагдаагийн хэлтэстэй хамтран явууллаа. Энэ үеэр тусгай зөвшөөрөлгүй валют арилжаа эрхэлсэн дөрвөн иргэнд хариуцлага ногдуулж, зөрчлийг давтахгүй байхыг анхааруулж, нэг аж ахуйн нэгжид прокурорын хяналтанд зөрчлийн хэрэг нээж, шалган шийдвэрлэх ажиллагааг эхлүүлсэн байна.

Санхүүгийн зохицуулах хороо тусгай зөвшөөрөлгүйгээр валютын арилжаа эрхлэгчдийг зогсооход олон нийтийн оролцоо чухал. Иргэдийн гар дээрээс болон үйл ажиллагаа явуулах зөвшөөрөлгүй аж ахуйн нэгжээс валют худалдах, худалдан авахгүй байхыг анхааруулж байна. Учир нь хуурамч валют авах дам хэлбэрээр  хууль бус ажиллагааг дэмжсэн болох эрсдэлтэй. Валютын арилжаа эрхлэгчдийн хувьд ч иргэдийг валют солиулах тухай бүрд хуруу уншигч төхөөрөмж ашиглаж мэдээллийг баталгаажуулах, төлбөрийн и-баримтыг олгох үүрэгтэй. 

Эх сурвалж: Санхүүгийн зохицуулах хороо