Орон нутгийн төсвийн орлого энэ оны эхний хагас жилийн урьдчилсан гүйцэтгэлээр 1.8 их наяд төгрөг, зарлага ба эргэж төлөх цэвэр зээл 1.3 их наяд төгрөг болж, орон нутгийн тэнцвэржүүлсэн тэнцэл 493.6 тэрбум төгрөгийн ашигтай гаржээ.

Энэхүү  тэнцвэржүүлсэн тэнцлийн ашиг өмнөх оны мөн үеийнхээс 229.5 (86.9 хувь) тэрбум төгрөгөөр нэмэгдсэнийг Үндэсний статистикийн хороо мэдээлэв.

Орон нутгийн төсвийн орлого өмнөх оны мөн үеийнхээс 135 (найман хувь) тэрбум төгрөгөөр нэмэгдэхэд татварын орлого 184.2 (32.6 хувь ) тэрбум төгрөгөөр өссөн нь нөлөөлжээ.

Орон нутгийн нийт төсвийн орлого, тусламжийн хэмжээ энэ оны зургаадугаар сард 412.4 тэрбум төгрөг болж, өмнөх сарынхаас 132.3 (47.2 хувь) тэрбум, нийт зарлага, эргэж төлөх цэвэр зээлийн нийт хэмжээ 330.3 тэрбум төгрөг болж, өмнөх сарынхаас 126.3 (61.9 хувь) тэрбум төгрөгөөр тус тус нэмэгдсэн аж.