Нийслэлийн Чингэлтэй дүүргийн 17 дугаар хороо Зүрх уул орчимд төөрсөн хөгжлийн бэрхшээлтэй иргэнийг гурав дахь өдрөө эрэн хайж байна.

Тодруулбал, Онцгой байдлын газарт энэ сарын 19-ний 22:32 цагт хүн төөрсөн тухай дуудлага мэдээлэл бүртгэгдсэн бөгөөд дуудлагын дагуу Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчид эрэн хайх ажиллагааг эхлүүлсэн. Улмаар Зүрх уулыг тойрон 50 километр, Зүүн салааны Билгүүний ам, Яргайтын ам орчимд 20 километр газарт явганаар хайсан боловч үр дүнд хүрээгүй байна. Иймд өчигдөр буюу долдугаар сарын 20-ны 22:05 цагт эрлийн ажиллагааг түр зогсоож өнөөдөр дахин эхлүүлжээ.

 Зүрх ууланд төөрсөн 32 настай эрэгтэй Н нь тус дүүргийн харьяат юм байна.