Дэлхийн шатрын олимпиадад амжилттай оролцсон Монгол Улсын шатарчид эх орондоо өчигдөр ирлээ. Энэ үеэр Монгол Улсын эмэгтэй шигшээ багийн дөрөвдүгээр ширээнд амжилттай тоглож, хувийн дүнгээр алтан медаль хүртсэн, ОУШХМ Бат-Эрдэнийн Мөнгөнзултай цөөн хором ярилцлаа.

-Аян замдаа сайн явж ирэв үү. Дэлхийн шатрын олимпиадад амжилттай оролцон медаль хүртсэнд баяр хүргэе.

     -Сайн явж ирлээ. Баярлалаа. Дэлхийн шатрын 44 дүгээр олимпиадад эх орноо төлөөлж, анх удаа оролцон, дасгалжуулагч, багийн эгч нарынхаа тусламж, дэмжлэгийн хүчээр амжилттай тоглоод ирлээ. Манай баг нэгдмэл, нэг зорилготой байж чадсан нь багаараа амжилт гаргах үндэс болсон.

-Ширээндээ түрүүлж медаль хүртэнэ гэдэг том амжилт шүү?

       -Би дөрөвдүгээр ширээнд тоглож хувийн дүнгээр алтан медаль авсан. Энэ амжилтыг гаргахад багийн хамт олон, эгч нар дэм, тус боллоо. Үргэлж хамт байж, зааж зөвлөж байсан багш нартаа, багийнхандаа, их баярлаж  байна. Ширээндээ алтан медаль авна гэдэг бараг л боломжгүй, маш хэцүү зүйл. Медаль хүртсэндээ сэтгэгдэл их өндөр байгаа.

-Анх удаа дэлхийн энэ том тэмцээнд орж үзэхэд сэтгэл зүйн хувьд  хэр бэлтгэгдсэн байв?

      -Миний хувьд ийм өндөр чансаатай дэлхийн шатрын олимпиадад анх удаа оролцож үзэж байгаа болохоор эхний өрөгт багагүй сандралтай байсан ч дараагийн өргөөс тайвширч, төвлөрч чадсан. Дэлхийн хэмжээний том тэмцээнд оролцож байгаа миний гурав дахь тохиолдол. Би гуравдугаар ангид байхдаа Арабын нэгдсэн Эмирт Улсын Аль Айн хотноо явагдсан өсвөр үеийн шатарчдын дэлхийн аварга шалгаруулах тэмцээнд анх удаа оролцож  мөнгөн медаль хүртэж байсан л даа.

-Тэгэхээр их багаасаа шатар тоглож сурчээ?

      -Цэцэрлэгт байх үеэсээ л нүүдэл заалгаж сурсан. Аав, ах хоёр маань намайг шатарт дуртай болгосон. Эрдэнэтийн “Хангарьд” спорт хорооны шатрын багш Н.Баттулга багш манай цэцэрлэгийн хүүхдүүдэд шатар заадаг байсан юм.

-Дараагийн зорилго гэвэл?

      -Цаашид илүү их хичээж зүтгэнэ. Ирэх сард болох өсвөр үеийн дэлхийн аварга шалгаруулах тэмцээнд амжилт гаргахын төлөө хичээнэ.