-БИ ТЭР ТОГЛОЛТОД АМИА ТАВЬЖ ТУЛАЛДСАН ШҮҮ ДЭЭ-

“Рио-2016” олимпод Монгол Улсын Гавьяат тамирчин Д.Отгондалай сонирхогчдын боксын 60 килограмм жинд оролцож, шигшээ дөрөвт Францын боксчин Софиане Оумихад ялагдал хүлээсэн. Тэгвэл уг тулааныг үр дүнг засахын тулд 250 мянган ам.долларын хахууль өгсөн байж болзошгүй талаар ОХУ-ын тамирчид төрийн дэмжлэгтэй допинг хэрэглэж байсныг илрүүлж байсан Канадын хуулийн профессор Ричард МакЛарен мэдээлжээ. Тэрбээр “2016 оны олимпын үеэр Монголын Д.Отгондалай болон Францын Софиане Оумиа нарын дунд болсон тулааны үр дүнг засахын тулд Францын талаас 250 мянган ам.долларын хахууль өгсөн байж болзошгүй” гэсэн юм.

Бид энэ талаар Гавьяат тамирчин Д.Отгондалайгаас тодрууллаа. Тэрбээр

“Таван шүүгч тавуулаа ижилхэн дүн өгнө гэсэн ойлголт бараг байдаггүй юм. Олимпын наадам чинь улсын хэмжээнд хүртэл яригддаг том зүйл шүү дээ.

          Миний бодлоор “250 мянган ам.доллар өгөхгүй бол танай тамирчныг ялагдуулна” гэсэн барьцаа шиг л зүйл дээгүүр яригдсан юм шиг байгаа юм. Тэгээд л авлигыг нь өгч чадаагүй болохоор л намайг ялагдуулсан байгаа юм.

          Уг нь бол би тэр тоглолтод амиа тавьж тулалдсан шүү дээ” хэмээсэн юм.