Сэлэнгэ аймгийн Жавхлант сумын Моностой багийн Хөх хошуу гэдэг газар морьтой хүүхэд голд урсжээ. Тус аймгийн Онцгой байдлын газрын Эрэн хайх, аврах ангийн алба хаагчид, тус сумын Засаг даргын Тамгын газрын ажилтнууд, өчигдөр  21:01 цагт очиход 16 настай, эрэгтэй Ө нь Ерөө голын арал дээр байсныг аврах завь ашиглан аварч, аав А-д хүлээлгэж өгсөн байна. Энэ талаар голд урссан хүүгийн ээж н.Буяннэмэхээс тодруулахад “Өчигдөр манай хүү эмнэг морь сургаж байгаад, морь нь шуугаад Ерөө гол руу авч давхисан байна лээ. Тэгээд морь нь голд урсаад, өөрөө голын цаана арай гэж гарсан байна. Оройхон Сэлэнгэ аймгийн Онцгой байдлын газраас хүмүүс ирж, аварсан. Тэр хугацаанд бид голын наана, цаана сэтгэл тогтворгүй, хэцүү байлаа. Хүү минь хэдий өөрөө амьд гарсан ч мориндоо их санаа зовсон юм шиг байна лээ. Гарч ирээд уйлаад байсан. Их айсан бололтой “Ээжээ намайг юм аварсан байхаа. Голын дунд ганцхан нарийхан бургас таарч, түүнээс шүүрч атгаад, зүтгэсээр байгаад голын цаана гарсан” гэж ярьсан” гэлээ.