Наадмын өдрүүдэд буюу таван хоногийн хугацаанд зам тээврийн ослын шинжтэй 1800 гаруй дуудлага, мэдээлэл бүртгэгдсэн байна. Энэ талаар ТЦА-ны Урьдчилан сэргийлэх хэлтсийн ахлах зохицуулагч, цагдаагийн ахмад Д.Ганхуягаас тодрууллаа.

-Наадмын өдрүүдэд зам тээврийн ослын шинжтэй дуудлага, мэдээлэл олон гарчээ. Үүний шалтгаан нөхцөл нь юу вэ?

-Наадмын өдрүүдэд нийслэлээс орон нутгийг чиглэсэн хөдөлгөөн нэмэгддэг. Үүнтэй холбоотойгоор нийслэлээс гарч байгаа таван замд хөдөлгөөний ачаалал нэмэгдэж, урт цуваа үүссэн. Энэ үед жолооч нар гүйцэж түрүүлэх үйлдэл хийснээр ихэнх тохиолдолд осол гардаг. Мөн орон нутгийн замд хурд хэтрүүлэх, хориглосон нөхцөлд гүйцэж түрүүлэх үйлдэл хийх зэрэг замын хөдөлгөөний дүрэм зөрчсөнөөс үүдсэн зам тээврийн осол олон гарлаа. Хүн амиа алдсан, бэртэж гэмтсэн нийт ослын 76.6 хувь нь орон нутгийн замд үйлдэгдсэн байдаг.

-Зөвхөн орон нутаг гэлтгүй, нийслэлд ч мөн олон осол гарсан шүү дээ?

-Наадмын өдрүүдэд нийслэлийн замын хөдөлгөөний ачаалал сийрэг байсантай холбоотойгоор жолооч нар хурд хэтрүүлж, энэ нь осол гарах шалтгаан нөхцөл болсон тохиолдлууд байна. Нийслэлд хэд хэдэн ноцтой осол бүртгэгдсэн.

-Жолооч нарт сэрэмжлүүлэг, зөвлөмж өгөхгүй юү?

-Энэ жил олон аймаг, сумын тэгш ой тохиож буйтай холбоотойгоор орон нутгийг чиглэсэн хөдөлгөөн ихсэж байгаа. Иймээс жолооч нар тээврийн хэрэгслийн бүрэн бүтэн байдлыг хангах, шалгах, авч явах дагалдах хэрэгслүүдийг зөвхөн цагдаад үзүүлэх зорилгоор биш, цаашлаад амь нас, эрүүл мэндээ хамгаалах зорилготой зүйлс гэдгийг ухамсарлах хэрэгтэй. Мөн очиж байгаа аймаг, орон нутгийн цаг агаарын мэдээг урьдчилан харж, гарц гарамгүй газраар зорчихгүй байх, үерийн усны аманд буудаллахгүй байх, бага насны хүүхдэд тавих хараа хяналтаа сайжруулах шаардлагатай. Түүнчлэн хамгаалах бүс хэрэглэдэггүй зөрчил олон байдаг. Иймээс ТЦА-наас “Амь аврах алтан гурвалжин”, “Зуны зугаатай аялал” аяныг зохион байгуулж байна. Энэ хүрээнд хамгаалах бүсний хэрэглээнд хяналт тавин ажиллаж байгаа.