А ҮСЭГНИЙ ТӨЛӨӨХ "АРЫН ХААЛГА"

        Эрдмийн баяраараа А үсэг болсон олон хүүхэд барилгачин, үсчин, ачигч, жолооч, инженер, өмгөөлөгч, цагдаа, хилчин, улстөрч, тогооч, гагнуурчин гэх янз бүрийн мэргэжил сонгосон байдаг байх. Саяхан өнгөрсөн жил сургуулийн босгоор алхсан бяцхануудын эрдмийн баяр болжээ. Нүүр хуудсаар дүүрэн багачуудын цагаан толгойн үсэг болсон зураг хөвөрч, “Миний хүү, охин тийм үсэг боллоо. Онц сурдаг хүү, охин минь цагаан толгойн магнайд нь зогсож байна” гээд баярлаж, хөөрсөн эцэг, эхчүүдийн сэтгэгдэл дүүрэн байна.

            Саяхан  найзуудтай хэсэг чаталлаа. Нэг найз маань “Манай хүү эрдмийн баяртаа оролцоод ирлээ. Нөхөр бид хоёр хүүгийнхээ ачаар нүүрэн эгнээнд сэтгэл өндөр суулаа. Хүү минь цагаан толгой эхлэл болох А үсэг боллоо. Багштай нь ярьж, сургуулийнх нь удирдлагуудыг оролцуулж байж арай гэж А үсэг болголоо” гээд хүүхдийнхээ эрдмийн баяраар хүртэл арын хаалга татаж яваагаа илчилж орхив. Нөгөө нь зөрүүлээд “Онц сураад ч мөнгө байхгүй бол А үсэг болгож чадахгүй юм билээ. Хүүхдүүдээ тэгш байлгах үүднээс 35 үсгээ сугалуулсан ч мафан ордог юм шиг байна лээ” гээд л бичиж өгөв. Тэгсэн харин нэг найз маань “Би ч хүүдээ танай анги 39 хүүхэдтэй болохоор үсэг болж чадахгүй ч байж магад. Тийм учраас битгий сэтгэлээр унаарай” гээд явуулсан чинь Р үсэг болсон байна лээ” гээд тэдний яриа өндөрлөв.

Төд удаагүй байтал нэгэн фм-ээр үсэглэлийн баяр хэрхэн болдог байсан тухай ярилцсан бололтой. Нэгэн эмэгтэй цахим хуудастаа “...ямар тэнэг фм бэ. Хөтлөгч нь Я үсэг болсон хүүхэд муу сурдаг гэнэ. Манай охин Я үсэг болсон юм. Тэдний утга учиргүй яриаг сонссон охины минь царай хувьс хийгээд явчихлаа. Надаас “Ээж ээ, таны машины хөгжмөөр ярьсан ах “Я үсэг болсон хүүхэд муу сурдаг, муу хүүхэд байдаг” гэж ярилаа. Энэ үнэн юм уу” гээд асуулаа. Охиндоо юу ч хэлж чадсангүй хөгжмөө унтраалаа” гээд бичжээ.

            Юу гэж хэлэх гэсэн бэ гэхээр таны хүүхэд А үсэг болсон ч, Я үсэг болсон ч, үсэг болоогүй байсан ч хэвээрээ байна шүү дээ. Энэ хоёр үсгийн аль нэгийг нь сонгоод сайн явдаг гэвэл тэрэн шиг үлгэр байхгүй. Тавилангаараа л амьдарна шүү. Өөрсдийнхөө нэр нүүрийг бодож, зиндаархах гэсэндээ нялх үрээ авлигын хэрэгт хар багаас нь бүү оролцуулаарай. Хожим “Чиний аав, ээж чамайг А үсэг болгохын тулд сургуулийн захирал, багшид чинь мөнгө төлж байсан” гэж сонсвол хүүхэд тань таниас ичих байх даа...