Дарга болон эхнэр, нөхөртөө худлаа ярьтал фэйсбүүк, твиттер худал ярьсныг нь барьж өгсөн тохиолдол хаа сайгүй гарч байгаа ч сэрэмжлүүлэг болгох үүднээс хоёр жишээ дурдъя.

Багын найз маань найзуудтайгаа салхинд гарахаар болж дарга руугаа сүртэй ярьсан гэнэ. Амьсгаадаж байгаад л “Дарга аа, бие өвдөөд, халуураад, босч чадахгүй байна. Өнөөдөр эмнэлгээр явахаас” гээд л өвдсөн хүн шиг л ярагласан хүн ярьжээ. Дарга нь ч сандарч “Яаж туслах вэ. Мөнгө төгрөг байгаа юу. Таньдаг эмчдээ хэлж өгөх үү” гэж. Аялал ид дундаа үргэлжилж байтал дарга нь залгасан байна. Манай хүн ч яах вэ өвдсөн хүний хоолой гарган “Байна уу, дарга аа” гэтэл өөдөөс нь “Чи худлаа ярьж байгаа бол найзыгаа “Миний зургийг фэйсбүүктээ битгий оруул” гэж хэл” гэх нь тэр. Гэтэл хамт аялж яваа найз нь аяллын зургаа нүүр номдоо оруулсан байжээ.

           Их сургуулийн найзтайгаа таарсан чинь “Найз нь фэйсбүүкээс нэг болсон шүү. Саяны зургаа битгий оруулаарай. Саяхан ажлынхантайгаа ресторанд суухдаа эхнэрт “Хуралтай байна” гэж худлаа хэлээд удаагүй байтал эхнэр “Ажил чинь тарж байна уу” гэж байна. Аяархан гэгч нь “Хуралтай байна. Эргээд залгая” гээд “Энэ асуудлыг өшөө нухацтай ярих хэрэгтэй байна” гээд л хуралд сууж байгаа хүн шиг яриад, утсаа салгасан. Гэтэл манай ажлын нэг эмэгтэй аль хэдийнэ “Ажлынхантайгаа гоё сууж байна” гэсэн тайлбартай зураг фэйсбүүктээ оруулчихсан байсан” хэмээн ярив.