Монгол Улсын Ерөнхийлөгч Төрийн өндөр дээд одон, медаль гардууллаа. Энэ үеэр Улсын драмын эрдмийн театрын ерөнхий найруулагч Н.Наранбаатар Монгол Улсын Урлагийн гавьяат зүтгэлтэн цолоор энгэрээ мялаалаа. 

Тэрбээр “Төрдөө, ард түмэндээ их баярлаж байна. Биднийг үргэлж ирлэж, халуун алга ташилтаараа урам хайрлаж байдаг үзэгч олондоо баярлаж байгаагаа хэлье. Энэ жил манай Улсын драмын эрдмийн театрын 90 жилийн ой болох гэж байгаа. Нэг үгээр мэргэжлийн ууган байгууллага 90 нас хүрч байна гэсэн үг. Манай байгууллагаас олон сайхан урлагийн байгууллагууд төрөн гарсан байдаг. 90 жилийн ойд зориулж, манай байгууллага  том зорилго тавин ажиллаж байгаа. Тухайлбал, “Хаадын хаан” жүжгийн бэлтгэлд бид ороод байна. Бид ард түмнийхээ соён гэгээрүүлэх, оюуны хөтөч нь байхыг эрхэмлэж ажиллаж байна даа” хэмээн баярын сэтгэгдлээ хуваалцлаа.