Дуучин Magnolian буюу Б.Дөлгөөний “The Bride & the Bachelor” дууг “Netflix”-ээс 3000 ам.доллараар худалдаж авчээ. Ингэхдээ тус дуу “Outer Banks” цувралын хоёрдугаар бүлгийн тавдугаар анги дээр тоглогдож, дэлхий нийтийн анхаарлыг татан шуугиан тарьж байна. 

            “Outer Banks” цуврал нь “Netflix” дээр нийт 160 сая цаг тоглогдсон бөгөөд гуравдугаар улирлын үзэлт нь хоёр долоо хоногийн турш Netflix-ийн топ арван цувралыг тэргүүлж байна. 

           Дуучин Magnolian уг бүтээлээ "2013 онд зуслангийнхаа ариун цэврийн өрөөнд 15 минутын дотор зохиож, 2017 онд олны хүртээл болгож байсан" хэмээн хэвлэлд ярьсан удаатай. Тус бүтээлээ EP “Famous Man” хэмээх анхны богино хэмжээний цомогтоо оруулж, дуучин Ч.Цэлмүүнтэй хамтран дуулсан билээ.

        Б.Дөлгөөн 12 настайгаасаа гитар тоглож, өсвөр наснаасаа дуу зохиож эхэлсэн. Тэрбээр 2015 онд Playtime хөгжмийн фестивалиар анх удаа соло уран бүтээлээ толилуулж, Монголын хөгжмийн салбарт шинэ өнгө төрх болон гарч ирж байжээ. Энэ тоглолтын дараа тэрбээр анхны “Famous Men” цомгоо гаргасан нь фенүүдийнхээ тоог улам бүр өсгөсөн амжилтыг түүнд авчирсан юм. Улмаар дараа жил нь буюу  2016 оноос дэлхийн хэд хэдэн фестивальд тэрбээр оролцож байв. Түүний “Rome”, “Caroline”, “Өвөлжөө”, “Өөр хүмүүс”, “Сүүлчийнх биш” зэрэг дуу сонсогчдын сонсох дуртай дууны жагсаалтад өнөөдрийг хүртэл дээгүүрт жагсдаг билээ.