Монгол Улсад улс төрийн ууган хүчин Монгол ардын нам үүсэн байгуулагдсаны түүхт 105 жилийн ой, үндэсний тусгаар тогтнолоо сэргээн мандуулж, бүрэн эрхт байдлаа баталгаажуулсан "Эх орончдын өдөр"-т зориулсан улс, аймаг, цэрэг, сумын цолтой 256 бөхийн барилдаан өчигдөр боллоо.

     Тус барилдаанд Архангай аймгийн Батцэнгэл сумын харьяат, "Алдар" спорт хороо, зэвсэгт хүчний 013 анги, “Хатант Интернэйшнл” ХХК, “Суман Зурхай” ХХК, "Бөх Билэгт" дэвжээний бөх, улсын үнэн зоригт харцага Батсүхийн Зоригтбаатар түрүүллээ. Архангай аймгийн Хашаат сумын харьяат, "Алдар" спорт хороо, зэвсэгт хүчний 034 анги, БХИС, “Залуу Ноёд” ХХК, "Бөх Билэгт" дэвжээний бөх, улсын заан Сүхбаатарын Сүхбат үзүүрлэв.

     Их шөвөгт Ховд аймгийн Буянт сумын харьяат, "Аврагч" спорт хороо, “Од” групп, “Эм Жи Өү Транс” ХХК, “Зорчигч Тээвэр-1” ОНӨААТҮГ, “Ховд” дэвжээний бөх, улсын аварга О.Хангай, Сэлэнгэ аймгийн Цагааннуур сумын харьяат, “Алдар” спорт хороо, “Атар Трейд” ХХК, “АПУ” ХК, “Таван Хан” дэвжээний бөх, улсын арслан Б.Орхонбаяр нар шалгарлаа.

     Дунд шөвөгт улсын харцага Н.Золбоо, улсын харцага Ц.Мөнхбаяр, аймгийн хурц арслан Б.Очирхүү, аймгийн арслан М.Баяржавхлан нар үлдэв. Зохион байгуулагчдын зүгээс "Өсөх ирээдүйтэй бөх"-ийн шагналыг аймгийн арслан М.Баяржавхланд гардуулсан юм.

Тус барилдааны түрүү бөх: 10 сая төгрөг

Үзүүр бөх: 8 сая төгрөг

Их шөвөг: Тус бүр 5 сая төгрөг тус тус гардсан юм.

   Дараагийн барилдаан гуравдугаар сарын 7-ны 13:00 цагт "Хангайн Ган-Эрдэнэ" ХХК-аас ивээн тэтгэн, зохион байгуулж буй Завхан аймгийн Түдэвтэй сумын түүхт 100 жилийн ойд зориулсан, тус сумын харьяат, Монгол Улсын начин Уснихын Балжиннямын нэрэмжит улс, аймаг, цэргийн цолтой хүчит 128 бөхийн барилдаанаар үргэлжилнэ.