Монгол ардын аман билгийн нэн эртний төрлийн нэг болох “ЮНЕСКО-гийн “Яаралтай хамгаалах шаардлагатай Соёлын биет бус өвийн жагсаалт”-д 2009 онд бүртгэн тунхагласан Монгол туулийн уламжлалт урлагийг орчин үеийн хөгжмийн зэмсэгтэй хослуулан хөгжүүлэх зорилготой “Монгол туульс рок” төслийн нээлтийн арга хэмжээ Соёлын өвийн үндэсний төвийн “Өв эрдэнэ” театрт өнөөдөр зохион байгуулагдлаа.

    "Монгол туульс рок" нэгдлийн уран бүтээлчид "Эртний сайн хан харангуй" туулийг хайлсан уг арга хэмжээнд Монгол Улсын Их Хурал болон Засгийн газрын гишүүд, эрдэмтэн, судлаачид зэрэг 80 орчим хүн оролцлоо. Монгол тууль бол монгол ардын аман билгийн нэн эртний төрөл хэлбэрийн нэг юм. Хэдэн зуугаас хэдэн түмэн мөр шүлгээс бүрдэл болдог том туурвил билээ.

     Туульсийн бүтээлүүд нь эртний шүтлэг, бөө мөргөл, бурхны шашин, домог зүйн болон уран сайхны сэтгэлгээний олон үе давхрагыг хадгалсан бөгөөд дотроо үлгэр, домог, ерөөл, магтаал, зүйр цэцэн үг, цацал мялаалга, бэлэг дэмбэрэлийн үг, домог шившлэг зэрэг аман зохиолын олон төрөл зүйлийг багтаан агуулж байдаг онцлогтой юм.

    Монголчууд туулийг аян дайн, найр хурим, эрийн гурван наадам зэрэг нийтийг хамарсан үйл явдал, баяр ёслол болон өрх гэр, хотол айлын хүрээнд хайлуулсаар иржээ. Тиймээс туулийг хайлуулж сонсох нь монголчуудад эх нутаг, эх хэл, соёл, элгэн садан, овог угсаагаараа бахархах, эх оронч үзлийг төлөвшүүлэхэд чухал нөлөө үзүүлж ирсэн юм.