Герман Улсын НРВ муж дахь “Соёл” монгол дунд сургууль XVII жарны гал морин жилийн цагаан сарын баярт зориулсан хүүхдийн үндэсний бөхийн тойргийн барилдаан анх удаа энэ сарын 21-ний өдөр амжилттай явуулжээ.

   Энэхүү арга хэмжээг НРВ муж дахь Герман-Монголын “Үүд" нийгэмлэгийн дэмжлэгтэйгээр “Хүчтэн” дэвжээ болон “Соёл” сургуулийн хамт олон хамтран зохион байгуулсан байна.

   Тус барилдаан нь хүүхэд багачуудын үндэсний бөхийн спортыг сонирхон хичээллэх идэвхийг нэмэгдүүлэх, монгол үндэсний өв соёл, уламжлалыг өвлүүлэн таниулах, гадаад орчинд амьдарч буй хүүхдүүдийг эх орныхоо ёс заншилтай холбох зорилготой байлаа.

   Тус хүүхдийн барилдааны шөвгийн дөрөвт Х.Мэргэн, Д.Хүсэлзаяа, И.Ангараг, Б.Одбаяр нар үлдсэн аж.  Үүнээс " Соёл" сургуулийн Б.Одбаяр түрүүлж, " Хүчтэн" дэвжээний бөх И.Ангараг үзүүрлэсэн байна. “Уран гараа давааны шагналыг " Соёл" сургуулийн Д. Хүсэлзаяа, “Уран барилдааны шагнал”-ыг Х.Мэргэн нар тус тус хүртэн хуран цугларсан олныг баясгажээ.

   Энэхүү барилдааны дараагийн цуврал барилдааны тов гарсан байна. Дараагийн цуврал барилдааныг 2026 оны зургадугаар сарын 6-ны өдөр НРВ мужийн Воргхолцхаузен хотноо "Даншиг наадам”-ын үеэр зохион байгуулахаар болжээ.

   Тус барилдааныг хүүхдийн насны ангиллаар зохин байгуулах юм байна. Мөн  2026 оны долдугаар сарын 11-ний өдөр НРВ муж дахь Герман- Монголын “Үүд” нийгэмлэгээс зохион байгуулагдах наадмаар өсвөр үеийнхний дунд барилдаан тус тус явагдах хуваарь гарчээ.