Дашчойлин хийдийн нэрэмжит сар шинийн баярт зориулсан "Майдар бурхны авшиг" аймаг, цэрэг, сумын цолтой болон залуу 256 бөхийн барилдаанд Хэнтий аймгийн Өмнөдэлгэр сумын харьяат, "Алдар" спорт хороо, зэвсэгт хүчний 014 анги, “Юү Эл И” ХХК, “Бор-Өндөрийн уулын баяжуулах үйлдвэр”, “Эбэг” ХХК, "Хан Хэнтийн Аварга" дэвжээний бөх, аймгийн хурц арслан Даваасүрэнгийн Алтанцоож түрүүллээ. Дундговь аймгийн Эрдэнэдалай сумын харьяат, "Алдар" спорт хороо, зэвсэгт хүчний 034 анги, “АПУ” ХК-ийн бөх, аймгийн хурц арслан Нямсүрэнгийн Амгаланбаатар үзүүрлэв.

     Их шөвөгт Увс аймгийн Тэс сумын харьяат, "Сүлд" спорт хороо, “Дарьганга гоёл” ХХК, “Легал Полиц” ХХК, "Увс Нуур" дэвжээний бөх, аймгийн хурц арслан Б.Өсөхбаяр, Өмнөговь аймгийн Гурвантэс сумын харьяат, "Аврагч" спорт хороо, “Баатар ван Транс” ХХК, “Тэлмэн Ресурс” ХХК, "Говийн Хүчтэн" дэвжээний бөх, аймгийн арслан Б.Баянсүх нар шалгарлаа. Дунд шөвөгт аймгийн хурц арслан Э.Мөнхбаатар, Г.Төрмөнх, аймгийн арслан Б.Цагаанбанди, Б.Бат-Эрдэнэ нар үлдэв.

   Арван долдугаар жарны “Сүрээр дарагч” хэмээх гал морин жилийн сар шинийн баярт зориулсан улс, аймаг, цэрэг, сумын цолтой хүчит 256 бөхийн барилдаан 2026 оны хоёрдугаар сарын 16-17-ны өдрүүдэд 13.00 цагт “Монгол бөхийн өргөө”-нд зохион байгуулагдана. Тус барилдаанд зодоглох аймаг, цэрэг, сумын цолтой бөхчүүдэд эрх олгох барилдаан 02 дугаар сарын 15-ны 15:00 цагт зохион байгуулагдана.

   Сар шинийн уламжлалт барилдаанд улсын цолтой бөхчүүд, мөн МҮБХ-ноос зохион байгуулж буй барилдаануудын чансааг харгалзан, аймаг, цэрэг, сумын цолтой 70-80 бөх шууд оролцоно. Бусад бөхчүүд урьдчилсан шатны барилдаанд оролцож, эрхээ авах боломжтой юм.