Соёл, спорт аялал жуулчлал, залуучуудын яамны дэд сайд Г.Дашням ОХУ-ын Спортын сайд бөгөөд Оросын олимпын хорооны ерөнхийлөгч Михаил Владимирович Дегтяревтой 2026 оны хоёрдугаар сарын 10-ны өдөр Москва хотноо уулзсан байна.

    Уулзалтын үеэр хоёр оронд зохион байгуулагдах спортын арга хэмжээ, тэр дундаа жүдо, чөлөөт бөх, сагсан бөмбөгийн төрлийн тэмцээнүүдэд тамирчдыг харилцан оролцуулахаар тохиролцож, биеийн тамир, спортын салбарын хүний нөөцийн чадавхыг бэхжүүлэх, биеийн тамирын боловсролын хүртээмжийг нэмэгдүүлэх чиглэлээр хамтарч ажиллах талаар санал солилцжээ.

    Уулзалтын төгсгөлд “Монгол Улс, ОХУ хооронд Биеийн тамир, спортын салбарт 2026-2028 онд хамтран ажиллах арга хэмжээний төлөвлөгөө”-д гарын үсэг зурж, энэхүү төлөвлөгөөний дагуу 2026-2028 онуудад салбарын хамтын ажиллагаагаа улам өргөжүүлж, спортын олон төрлийн арга хэмжээ, тэмцээн уралдаан харилцан зохион байгуулахаа баталлаа.