Монгол Улсын нийслэл Улаанбаатар хотод Олон улсын жүдо бөхийн холбоо “IJF”-ийн Гранд Слам” тэмцээнийг дахин дөрвөн удаа зохион байгуулах эрхээ МЖХ баталгаажууллаа. 2026 оны Парисын “Их Дуулга” тэмцээний үеэр Олон улсын жүдо бөхийн холбооны (IJF) ерөнхийлөгч Мариус Визер болон Монголын жүдо бөхийн холбооны ерөнхийлөгч, Х.Баттулга нар Улаанбаатар хотод дөрвөн удаа “Их дуулга” тэмцээнийг зохион байгуулах гэрээнд гарын үсэг зурлаа.

    Энэхүү гэрээний сунгалт нь Монгол Улсын олон улсын жүдо спорт дахь чухал байр суурийг дахин нотолж байна. Монгол Улс зөвхөн аваргуудын орон төдийгүй дэлхийн түвшний томоохон тэмцээнүүдийг өндөр зохион байгуулалттайгаар хүлээн авч чаддаг гэдгээ олонтаа харуулсан билээ. Улаанбаатар хотод зохион байгуулагдсан “Их дуулга” тэмцээн болгонд спортын өндөр өрсөлдөөн, хөгжөөн дэмжигчдийн халуун уур амьсгал, төгс зохион байгуулалтыг хослуулж ирсэн.

    Энэ жилийн тэмцээн “Лос-Анжелес-2028” олимпын наадмын эрх олгох албан ёсны онооны циклыг эхлүүлэх “Их дуулга” тэмцээнийг зохион байгуулна. Энэхүү чухал мөчийг дэлхийн олон орны тамирчид, холбоод тэсэн ядан хүлээж дараагийн олимпын замын эхлэл болж байгагаараа онцлог болж байна. Ийм ч учраас “IJF”-ээс Монгол Улсад итгэх итгэлээ дахин баталгаажууллаа.

    Монголын жүдочид тууштай, тэсвэртэй, хүндлэлтэй, тогтвортой амжилтаараа дэлхийд хүлээн зөвшөөрөгдсөн. “Их дуулга”, дэлхийн аварга, олимпын дэвжээн дээр тогтмол медалийн эгнээнд зогсож ирсэн түүхтэй. Эх орондоо зохион байгуулагдах энэхүү тэмцээн нь залуу тамирчдад дэлхийн шилдгүүдийг ойроос харах, үлгэр дуурайл авах ховор боломжийг олгох бол гадаадын баг, төлөөлөгчид жүдо спортын үнэт зүйлс болох хүндлэл, эр зориг, нөхөрлөлийг эрхэмлэдэг ард түмэнтэй танилцах боломжтой.

   “IJF”-ийн ерөнхийлөгч ноён Мариус Визер болон МЖБХ-ны ерөнхийлөгч Х.Баттулга нар гэрээнд гарын үсэг зурж гар барилцаж харилцан итгэлцэл, ирээдүйн нийтлэг алсын харааг бэлгэдэв. Монгол Улс дэлхийг угтсаар байх болно. Дэлхий Монголыг жүдо бөхийн спортоор дамжуулан шинээр нээх болно.