Хятадын Гуанши мужийн Янгшуо хотод 2026 оны нэгдүгээр сарын 31-нээс, хоёр дугаар сарын 6-ны өдрүүдэд  олон улсын хүүхдийн “Yangshuo CUP-2026” хөл бөмбөгийн цомын тэмцээн боллоо. Тус тэмцээнд Монгол Улсаас “Дэрэн” клубийн өсвөр үеийн тамирчид амжилттай оролцсон байна.

    Тус цомын тэмцээнд долоон улсын 110 баг өрсөлджээ.  “Дэрэн” клубээс “U8”, “U10”, “U12” насны ангилалд гурван баг 50 тамирчин, багш дасгалжуулагчийн бүрэлдхүүнтэй оролцжээ. Үүнээс “U8” насны тамирчид, найман тоглолт хийснээс зургаан хожил, нэг тэнцэл, нэг хожигдолтойгоор 30 багаас шөвгийн дөрөвт шалгарч хүрэл медал, цомын эзэд болсон байна.

    Харин “U10” насны баг тамирчид нийт найман тоглолт хийснээс дөрөв хожиж, дөрөв хожигдсон үзүүлэлтээр 16 багаас VII байрт бичигдэж, тэмцээнийг өндөрлүүлжээ. Харин “U12” насны баг тамирчид нийт найман тоглолт хийж, дөрвөн хожил, нэг тэнцэл, гурван хожигдлоор 15 багаас VI  байрт шалгарчээ.