Олимпын таеквондо-гийн “Арслан” клубийн дасгалжуулагч, ОУХМ Самдансүрэнгийн Янжинлхам багштай ярилцлаа. Тэрбээр таеквондо-гийн спортын олон улсын хар бүс V дантай.  Монгол Улсын таеквондо-гийн УАШТ-ий есөн удаагийн аварга. Оюутны Азийн аваргын мөнгө медальтай.  2015 оны ДАШТ-ий тавдугаар байрын шагналт, манай улсын нэгэн цаг үеийн шилдэг эмэгтэй таеквондо-гийн мастеруудын нэг билээ.

-“Элчингийн цом-2025” тэмцээнд амжилттай оролцсонд баяр хүргэе.

      -Баярлалаа.

-Танай клуб “Элчингийн цом-2025” тэмцээнээс хэдэн медаль  хүртэж, ямар амжилт үзүүлэв ээ?

    -Манай клуб  Өмнөд Солонгосын Элчин сайдын нэрэмжит “Элчингийн цом-2025” тэмцээний  хар бүсний эмэгтэйчүүдийн ангилалд нэгдүгээр байр, хар бүсний эрэгтэйчүүдийн ангилалд хоёрдугаар байр эзэлсэн. Хар бүсний ангилалд долоон алт, зургаан мөнгө, дөрвөн хүрэл медаль хүртсэн.

-Одоо танай клубт хэдэн багш, дасгалжуулагчийн удирдлага дор хичнээн хүүхэд, залуус таеквондо-гоор хичээллэж байгаа вэ?

     -Манай клуб хоёр дасгалжуулагчтай.  МУГД С.Ган-Эрдэнэ багш, бид хоёр клубийнхээ сургалтыг явуулж байгаа. Манай клуб дээр 120 гаруй хүүхэд, залуус тогтмол бэлтгэл, сургуулилалт хийж, хичээллэж байна.

-Та өөрийгөө манай уншигчдад танилцуулахгүй юу?

       -Намайг Самдансүрэнгийн Янжинлхам гэдэг.  2009 оноос таеквондогийн спортоор “Арслан” клубт хичээллэж эхэлсэн. Би ОУХМ цолтой. 2015 оноос хойш клубтээ багш, дасгалжуулагчаар ажиллаж байна.

 -Аль аймаг, хотод төрж, өссөн хүүхэд вэ?

      -Би Улаанбаатар хотод төрж, өссөн, хотын унаган хүүхэд.

 -Яагаад таевондо-гийн спортыг сонгож хичээллэх болсон юм бэ?

      -Манай ээжтэй хамт ажилладаг байсан эгч намайг анх таеквондо-гийн клубийн сургалтад оруулсан юм. Би өөрөө бол таеквондо гэж юу байдгийг мэдэхгүй. Таеквондо-гийн талаар ямар ч анхны төсөөлөлгүйгээр ээжийнхээ үгэнд ороод л хичээллэж эхэлсэн. Клубийн сургалтад явж, хичээллээд таеквондод  дуртай болсондоо.

 -Таеквондо-гийн спортоор хэд дэх жилдээ хичээллэж байгаа вэ?

    -Таеквондо-гийн спортоор 2009 оноос эхлэн хичээллэсэн гэхээр таеквондо-гийн спорттой холбогдоод одоо 16  дахь жилээ  явж байна.

 -Одоо таеквондо-гийн хар бүс хэддүгээр дантай мастер багш вэ?

      -Таеквондогийн спортын олон улсын хар бүс, тавдугаар  дантай.

-Улсын шигшээ багийн тамирчин байсан  санагдах юм?

     -Тийм ээ,  2013 онд таеквондогийн анхны улсын шигшээ багт тамирчин болон орж байлаа.

 -Дасгалжуулагчийн албанд шилжээд хэдэн жил болж байна вэ?

     -Багш, дасгалжуулагчийн ажил, албанд шилжиж ороод арав дахь жилдээ ажиллаж байна.

-Тамирчин хүн зөвхөн өөрийн ур чадварт анхаарал хандуулдаг. Харин дасгалжуулагч хүн бүх тамирчдын амжилт, ур чадварыг дээшлүүлэхийг боддог. Тамирчидтай ажиллах, тэдний сэтгэл зүйг ойлгож, мэдрэх амаргүй биз?

     -Хүүхэд бүр харилцан адилгүй, дахин давтагдашгүй өөр, өөрийн онцлогтой. Өвөрмөц сэтгэл зүйтэй, амьдралын харилцан адилгүй, дадал, зуршилтай байдаг.  Хүүхэд бүрийн зан араншин, сэтгэл зүйд тохируулж ажиллана гэдэг бас амаргүй л дээ. Миний түшиг, тулгуур болсон багш маань хажууд байдаг болохоор мэдэхгүй, чадахгүй зүйлийг багшаасаа асууж, зөвлөгөө, тусламж авдаг. Багшаасаа их зүйлийг сурч байгаа.

-Улсын аварга шалгаруулах тэмцээний “Мастерс” ангилаллд  түрүүлж байсан  санагдах юм?

      -Дасгалжуулагч болсныхаа дараа насанд хүрэгчдийн УАШТ орж 2023 болон 2024 онд улсын аварга болж байсан.

 -Дасгалжуулагч хүн, шавь нартайгаа цуг тэмцээнд орох мэдрэмж ямар байсан бэ?

      -Тамирчдадаа зөвлөдөг, зөвлөгөөгөө өөрөө тэмцээн дээр хэрэгжүүлж, үлгэрлэхийг хичээсэн.

-Таны сэтгэлд хоногшин үлдсэн хамгийн сайхан дурсамж үлдээсэн ямар тэмцээн байдаг вэ?

     -Миний оролцсон тэмцээнүүд маань бүгд л маш их сайхан, гэгээн, гэгээлэг дурсамжийг үлдээсэн дээ.

-Таеквондо-гийн спортоор гаргасан өөрийн амжилтуудыг сонирхуулахгүй юу?

    - Монгол Улсын таеквондогийн УАШТ-ий есөн удаагийн аварга.  Оюутны Азийн аваргын мөнгө медальтай.  2015 оны ДАШТ-ий шагналт тавдугаар байрт орж байсан.

-Тамирчин байх үедээ бусад тулааны спортын тэмцээнд ордог байсан уу?

      -Бусад тулааны урлагийн тэмцээнд ёстой орж үзээгүй. Сонирхдоггүй байсан.

-Та тулаан, пүмсэгийн аль төрөлд нь  илүү сонирхолтой вэ?

       -Би тулааны төрлийн тамирчин байсан болохоор тулаандаа илүү байлаа. Харин одоо пүмсэгийн төрлийг илүү сонирхож,  шавь нартаа сайн зааж, сургахыг хичээж байна.

-Одоо танай клубийн тамирчдын оролцох ямар тэмцээнүүд хүлээж байгаа вэ?

   -Одоо манай клубийн тамирчид  “Ирээдүйн-Одод” тэмцээнд оролцохоор бэлтгэл, сургуулилалтаа хийж байгаа.