Жүдо бөхийн 2025 оны дэлхийн аварга шалгаруулах тэмцээний зургаа дахь өдрийн барилдаан өнөөдөр Унгар Улсын Будапешт хотод эхэлнэ. Энэ удаагийн ДАШТ-д дэлхийн 93 орны эрэгтэй 294, эмэгтэй 262, нийт 556 жүдочин өрсөлдөж байгаа. Өнөөдөр эрэгтэйчүүдийн -100 кг, эмэгтэйчүүдийн -78 кг-ын жингийн барилдаан болно. Манай улсаас эмэгтэйчүүдийн -78 кг-ын жинд бөх барилдахгүй.

ЭРЭГТЭЙЧҮҮДИЙН -100 КГ-Д Б.ХҮДЭРЧУЛУУН, М.ХҮСЛЭН

       Эрэгтэйчүүдийн -100 кг-ын жинд 42 тамирчин барилдана. Манай улсаас 22 настай залуу тамирчин,Баярцэнгэлийн Хүдэрчулуун “С” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Английн Oliver BARRATT-тай барилдана. Хэрэв түүнийг ялж чадах юм бол гуравдугаар тойрогт, шөвгийн 16-д Тажикстан, Энэтхэг, Туркийн тамирчдын хэн ялсантай хүч үзнэ.

      “IJF” буюу Олон улсын жүдо бөхийн холбооны дүрвэгчдийн багийн нэр дээр, 23 настай залуу тамирчин, Мөнхөөгийн Хүслэн барилдана. Тэрбээр “D” хэсгийн нэгдүгээр тойрогт дэлхийн аварга Португалийн тамирчин Jorge FONSECA-тай таарсан. Хэрэв түүнийг ялж чадах юм бол хоёрдугаар тойрогт АНЭУ-ын Dzhafar KOSTOEV-той барилдана.