“Москва-1980” олимпын мөнгөн медальт, Ардын багш, гавьяат тамирчин, улсын начин, МҮОХ-ны дэд ерөнхийлөгч Цэндийн Дамдин агсан 1957 оны энэ өдөр Хэнтий аймгийн Баян-Адарга суманд мэндэлжээ. Ц.Дамдин багш “Москва-1980” олимпын наадмын жүдо бөхийн 65 кг-ын жингийн өөрийн хэсэгтээ дөрвөн барилдаан хийж ялаад олимпын аваргын алтан медалийн төлөө ЗХУ-ын бөх Солодунхентэй таарсан. Олимпын финалын барилдааны үндсэн цагт тэд хэн, хэнээсээ хоёр , хоёр коко үнэлгээ авч тэнцүү явсан юм. Барилдааны цаг дуусахад минут ч хүрэхгүй шахам хугацаа дутуу байх үед шүүгч ЗХУ-ын бөхийг илт дэмжиж,  Ц.Дамдинг торгосон. Тэгээд л Ц.Дамдин торгуулиар хожигдол хүлээсэн юм. Тэгэж л минут хүрэхгүй хугацаанд олимпын алтан медалийн оосроос атгаад алдаж байлаа. Оросын жүдочин Солодунхеныг нутгийн татами, шүүгчдийн ая тал зассан байдал л түшсэн билээ.