Азийн аваргын 70 кг-ын жинд зодоглосон гавьяат тамирчин Т.Тулга эхний хоёр учраагаа оноо алдалгүй ялж, хагас шигшээд шалгарлаа. Тэрбээр шөвгийн наймд Хятадын Тао Вейг 10:0-ээр оноогоор цэвэр ялсан юм. Одоо манай бөх Тажикистаны бөх, олимпын наадмын тавдугаар байрын шагналт, Азийн аваргын мөнгөн медальт Виктор Рассадинтай хагас шигшээд өрсөлдөх болно.

       Харин 57 кг-ын жинд хүч сорьж буй ОУХМ Б.Мөнх-Эрдэнэ мөн л эхний хоёр өрсөлдөгчөө хожиж, их шөвөгт үлдээд байна. Тэрбээр шөвгийн наймд Киргизстаны бөх, Азийн аваргын мөнгө, хүрэл медальт Алмаз Сманбековыг буулгаж авсан юм. Барилдаан ширүүн өрсөлдөөнтэй өрнөж, үндсэн цаг 8:8-аар тэнцэж дууссан бөгөөд манай бөх бүхэл онооны чанараар ялалт байгууллаа. Б.Мөнх-Эрдэнэ хагас шигшээд Хойд Солонгос буюу БНАСАУ-ын бөх, Азийн наадмын мөнгөн медальт Хан Чон Сонтой барилдана. Хагас шигшээд шалгарсан дараагийн бөх нь 79 кг-ын жинд ОУХМ О.Сүлдхүү байв. Тэрбээр дунд шөвөгт Японы бөх, U-20 ДАШТ-ий мөнгөн медальт Рюносүкэ Камияг 4:0-ээр хожлоо.