Азийн олимпын зөвлөлийн шийдвэрээр Азийн залуучуудын III наадмыг Бахрейн Улсын  Манама хотод аравдугаар сарын 22-31-нд зохион байгуулахаар болжээ.Энэ удаагийн наадамд спортын 23 төрлөөр 14-17 насны залуу тамирчид өрсөлдөх юм. Азийн залуучуудын наадмыг залуучуудын олимпын наадмын өмнөх жил зохион байгуулдгаараа онцлогтой бөгөөд залуу тамирчдад олон улсын түвшинд туршлага хуримтлуулах, ур чадвараа хөгжүүлэх боломж олгодог юм.

    Анх 2009 онд Сингапурт, 2013 онд БНХАУ-ын Наньжин хотод болсон тус наадмыг 12 жилийн дараа дахин зохион байгуулахаар болж байна. Энэхүү наадамд оролцох Монголын баг тамирчдын ахлагчаар МҮОХ-ны гүйцэтгэх зөвлөлийн шийдвэрээр УИХ, Засгийн газрын гишүүн, ЗГХЭГ-ын дарга Н.Учралыг томилжээ.